تندر قول اردو: ځاځي اريوب کې د ۱۱ پاکستانيانو په ګډون ۲۲ طالبان وژل شوي

ګردېز (پژواک، ۲۷ غبرګولی ۱۴۰۰): د پکتيا په ځاځي اريوب ولسوالۍ کې د حکومتي ځواکونو او طالبانو ترمنځ جګړه کې ٢٢ طالبان او درې سرتېري وژل شوي دي.

د تندر قول اردو وياند جګړن ايمل مومند پژواک ته وويل چې ګڼو وسله والو طالبانو د يادې ولسوالۍ اړوند بيانخېلو سيمه کې د ۲۰۳ تندر قول اړوند د پوله ساتو ځواکونو پر پوسته ډله ييز بريد وکړ، خو د امنيتي ځواکونو له سخت غبرګون او بريدونو سره مخ شول.

مومند وايي چې د يادې پوستې د سرتېرو او حمايوي ځواکونو د بريدونو په پايله کې د وسله والو بريد له ماتې سره مخ شو.

هغه زياتوي چې په دغو بريدونو کې د ١١ پاکستانيانو په ګډون ٢٢ وسله وال طالبان وژل شوي او څلور نور ټپيان شوي دي.

جګړن مومند وويل چې په دې جګړه کې د پوله ساتو ځواکونو درې تنه وژل شوي او شپږ نور ټپيان شوي دي.

د سيمې اوسېدونکی نورالله عزيز هم د سختې جګړې خبره کوي او وايي چې ګڼو وسله والو د سنګر په نوم پر لويه پوسته بريد کړی و.

عزيز پژواک ته وويل چې په جګړه کې ګڼ وسله وال وژل شوي چې په خبره يې مړي یې له فرضي کرښې هغې غاړې ته اړول شوي دي.

د پکتيا د ولايتي شورا مشر عبدالمالک ځاځی د ځاځي اريوب ولسوالۍ امنيتي حالت ته اندېښن دی او وايي که دې ولسوالۍ ته جدي پاملرنه ونه شي، شته ستونزې به يې نورې هم زياتې شي.

ځاځي وويل چې وسله والو مخالفينو پر يادې ولسوالۍ فشارونه زيات کړي او مخابراتي شبکې يې هم بندې دي.

بل لور ته د وسله والو طالبانو وياند ذبيح الله مجاهد وايي چې تېره ورځ او شپه يوازې په ډنډپټان ولسوالۍ کې جګړه شوې چې په خبره يې، دوه طالبان په کې ټپيان شوي دي.

هغه وايي چې په ځاځي اريوب کې د جګړې په اړه معلومات نه لري.