عبدالله: د جګړې له لارې واک ته د رسېدو هڅه لویه تېروتنه ده

کابل (پژواک، ٧ چنګاښ ١٤٠٠): د ملي مصالحې عالي شورا مشر عبدالله وايي، طالبان په داسې حال کې نه غواړي په مذاکراتو کې اصلي بحثونو ته داخل شي چې د جګړې له لارې واک ته د رسېدو هڅه یې لویه تېروتنه ده.

هغه دغه څرګندونې نن په کابل کې یوې خبرې ناستې ته وکړې.

عبدالله عبدالله وویل، د دوحې د هوکړې له مخې له افغانستانه د بهرنیو ځواکونو له وتلو سره سم باید سولې ته نږدې شوي وای، خو د سولې مذاکراتو په بهیر کې دا پایله ترلاسه نه شوه.

دی وايي، طالبان نه غواړي په مذاکراتو کې اصلي بحثونو ته داخل شي او د بهرنیو ځواکونو په وتلو سره د طالبانو ټولې پلمې د جګړې غځېدو او د عامه بنسټونو ورانولو لپاره ختمیږي.

د ده په وینا، که چېرې «یو اړخ» فکر کوي چې د جګړو په زیاتولو واک ته رسېدلای شي، نو لویه تېروتنه کوي.

هغه زیاته کړه چې د مسئلې د حل لپاره ښه لاره خبرې دي، خو دا کار د یوې ډلې په نیت نه شي ترسره کېدلی، څو چې مقابل اړخ هم دغه نیت ونه لري.

عبدالله زیاتوي: "په وروستیو کې امنیتي او دفاعي ځواکوانه د فشار یا د ځینو نورو لاملونو له مخې ماتې او شاتګ سره مخامخ شوي، ځینې سیمې له لاسه وتي، ځینې بیرته لاسته راغلي، خو زه انشاءالله یقین لرم چې د خدای په مرسته او د خلکو په ملاتړ به دغه بهیر متوقف شي، ځکه دا حالت د قضیې مناسب حل نه دی."

هغه یو وار بیا پر سیاسي اجماع ټینګار وکړ او زیاته یې کړه چې که افغانان سولې ته رسېږي او یا اوسنی حالت دوام کوي، خو د خلکو یووالی مهم دی.

عبدالله امریکا ته د افغان ولسمشر په مشرۍ د ده په ګډون د پلاوي تګ ته په اشارې وویل چې د امریکا لوړپوړو چارواکو او سنا غړو له افغانستان سره د نوې حوزې په چوکاټ کې وعده کړې چې پوځي حضور به نه لري خو مرستو ته به ادامه ورکوي.

دی وايي: "له افغانستانه د امریکايي ځواکونو په ګډون د ناټو ځواکونو د پوځي شتون پای ته رسېدل، له افغانستان سره د دوی د علاقې ختمېدو په معنا نه ده، بلکې په اړیکو کې د یوې نوې پاڼې پرانیستلو په معنا ده او له همدې امله امریکا ته وروستی سفر وشو."

هغه د نوې حوزې په اړه جزئیات ور نه کړل.

د ده په وینا، افغانانو ته د امریکا د ولسمشر عمومي پیغام دا و چې امریکا افغانستان کې د سولې، امنیتي او دفاعي ځواکونو ملاتړې ده او له افغانستان مرستو ته ادمه ورکوي.