کابل ( پژواک، ۲۴ چنګاښ ۱۴۰۰ ): د اداري اصلاحاتو او ملکي خدمتونو کمېسیون رییس وایي چې د طالبانو د یوې نوې طرحې له مخې د درېیو میاشتو اوربند په بدل کې د خپلو اووه زرو نورو بندیانو د خوشې کولو غوښتنه کړې ده.
د اداري اصلاحاتو او ملکي خدمتونو کمېسیون رییس نادر نادري چې د افغانستان د مذاکراتي ټیم غړی هم دی، دغه څرګندونې د چنګاښ په ۲۴ مه په کابل کې د یوې خبري غونډې پر مهال وکړې.
هغه زیاته کړه، د موقت حکومت جوړولو موضوع هڅې اوازې دي او په دې اړه تر اوسه رسمي څه نه دي ویل شوي او څه چې ډېر مهم دي هغه اوربند دی.
نادري وایي، قطر ته د افغان سیاسیونو د سفر په اړه خبرې روانې دي او دوه ورځې وروسته به د دې سفر په اړه رسمي اعلان وشي.
د مذاکراتي ټیم دغه غړي وویل چې د افغانستان مذاکراتي پلاوی په دوحه کې شته او د سولې لپاره یې ډېرې هلې ځلې کړې دي.
هغه زیاته کړه، وسله والو طالبانو په یوه نوې طرحه کې د خپلو اووه زرو بندیانو د خوشې کولو په بدل کې درې میاشتني اوربند ته چمتووالی ښودلی دی.
دا په داسې حال کې ده چې ټاکل شوې د حامد کرزي او عبدالله په مشرۍ یو پلاوی له طالبانو سره د خبرو اترو په موخه راتلونکو څو ورځو کې قطر ته ولاړ شي.
سرچینې وایي، دغه پلاوي له ولسمشر اشرف غني سره د طالبانو د بندیانو د خوشې کولو، د اوربند او د طالبانو د مشرانو نومونه له تور لېست څخه د ایستلو په تړاو د پرېکړې واکونه غوښتي دي.
طالبانو هم څو ځلې ویلي چې له امریکا سره د دوحې په تړون کې راغلي چې اووه زره نور بندیان یې باید خوشې شي.
د اوربند په اړه دوی ویلي چې په اړه یې په بین الافغاني مذاکراتو کې پرېکړه کیږي.
خو د نادري د تازه څرګندونو په اړه دوی تر اوسه څه نه دي ویلي.
Views: 307
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن