پلخمری (پژوک، ٢٤ تله ۱۴۰۰): په بغلان کې د حکومتي ځواکونو او مقاومت جبهې د پلويانو ترمنځ جګړه کې د مقاومت جبهې د دوو قوماندانو په ګډون شپږ کسان وژل شوي دي.
د بغلان ولایت د اطلاعاتو او فرهنګ ريیس مولوي مصطفی هاشمي پژواک خبري اژانس ته وويل چې د دغه ولايت په پلحصار ولسوالۍ کې د مقاومت جبهې ځينو کسانو تحرکات درلودل او د حکومت پر ضد يې فعاليتونه کول.
دى وايي چې د حکومتي ځواکونو او يادو کسانو ترمنځ تېره ورځ جګړه شوې چې په ترڅ کې يې د مقاومت جبهې د دوو قوماندانانو يعقوب او امام ګل نظر په ګډون شپږ کسان وژل شوي دي.
د نوموړي په وينا، په دې جګړه کې حکومتي سرتېرو ته مرګ ژوبله نه ده اوښتې.
په ورته وخت کې د دې صلاح ولسوالۍ يوه اوسېدونکي د نوم نه خپرولو په شرط پژواک ته وويل چې تېره ورځ په قاسان دره کې د طالبانو او مقاومت جبهې د پلويانو ترمنځ جګړه شوې ده.
دى وايي چې په ياده جګړه کې د مقاومت جبهې مشهور قوماندان يعقوب علي خان وژل شوى او څو نور ملګري يې ټپيان شوي دي.
د هغه په وينا، په جګړه کې طالبانو ته هم مرګ ژوبله اوښتې خو کره شمېره تر اوسه معلومه نه ده.
Views: 3566
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن