ایبک (پژواک، ۳ مرغومی ۱۴۰۰): د سمنګان ولایت په حضرت سلطان ولسوالۍ کې د یوه ۵۸۰ ډوله مسافر وړونکي موټر چپه کېدو له امله ۲ کسان مړه شوي او ۶ نور ټپیان دي.
د سمنګان ولایت مطبوعاتي مسوول خیرخواه سمنګاني وویل چې دغه پېښه تېره شپه شاوخوا ۱۰بجې د دغه ولایت د حضرت سلطان ولسوالۍ په یکه توت سیمه کې رامنځته شوې ده.
هغه زیاته کړه: «دغه موټر له مزار ښاره د کابل پر لوري روان و او لسګونه مسافر په کې سپاره وو چې د موټر چلوونکي د تېز تګ له امله له سړکه وتلی او چپه شوی دی.»
نوموړی وایي، د موټر چپه کېدو په دې پېښې کې ۲ کسان مړه او ۶ نور ټپیان شوي دي.
د نوموړي په وینا، د پېښې ټپیان د امنیتي ځواکونو له لوري د سمنګان مرکزي روغتون ته ولېږدول شوي دي.
په ورته مهال، د سمنګان ولایتي روغتون مسوولین هم دغه روغتون ته د ۲ مړو او ۶ ټپیانو لېږد تاییدوي.
د یاد روغتون د بېړنۍ برخې نوکریوال ډاکتر نجیب الله وویل چې د پېښې ټول ټپیان د ښې درملنې په موخه د بلخ ولایت حوزوي روغتون ته لېږدول شوي دي.
![په سمنګان کې د موټر چپه کېدو پېښه کې ۲ کسان مړه او ۶ نور ټپیان شوي](https://pajhwok.com/wp-content/uploads/2021/12/268068890_968030744108756_7397480709125685650_n-767x1024.jpg)
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن