ښرنه، غزني، قلات، نیلي (پژواک، ۱۹ کب ۱۴۰۰): د نوی لمریز کال په درشل کې په پکتیکا، غزني، زابل او دایکندي ولایتونو کې د زرګونو نیالګیو اېښودلو کمپاین پیل شو.
په دې لړ کې د پکتيکا ولايت په مرکز ښرنه کې د کرنې ریاست او ښاروالۍ له خوا په ګډه د ښار د ښکلا په موخه، د «ازاد افغانستان» تر نامه لاندې د نیالګیو اېښودل کمپاین پیل شو.
د پکتیکا مرکز ښرنې ښاروال ناصر هلال پژواک خبري اژانس ته وویل، ښاروالي او کرنې ریاست په ګډه سږ کال په لومړي ګام کې د ریاستونو د ودانیو د ښکلا په موخه، دوه زره بې مېوې نیالګي کښېنوي.
هغه زیاته کړه، د دې تر څنګ به د ښار په هغو سیمو کې هم نیالګي کېښودل شي چې ازاده ساحه ولري.
د کرنې رئیس مولوي شکیب وویل، زرګونه نیالګي یې کروندګرو ته ورکړي څو په خپلو ځمکو کې یې کښېنوي.
د پکتیکا والي عبدالله مختار وویل، په هېواد کې سرتاسري امنیت خوندي شوی، خلک دې یو نیالګی د ځان او بل د هېواد لپاره کښېنوي.
خو ده ټینګار وکړ چې د نیالګیو د اېښودلو تر څنګ دا ډېره مهمه ده چې د هغو سمه پالنه وشي.
په غزني کې هم د بې مېوې او مېوه لرونکو نیالګیو اېښودلو کمپاین د دغه ولایت د والي محمداسحق اخندزاده له خوا پیل شو.
والي وویل، د نیالګو اېښودلو کمپاین د ښاروالۍ او چاپېریال ساتنې ریاستونو سره په همغږۍ د کرنې ریاست له خوا پیل شو چې په لړ کې به یې په دغه ولایت کې شاوخوا یو نیم میلیون مېوه لرونکي او بې مېوې نیالګي کېښودل شي.
والي پر خلکو غږ وکړ چې د هوا د پاکوالي او د هېواد د سمسورتیا په موخه نیالګي کښېنوي او پالنه یې وکړي.
د دې تر څنګ د زابل د مرکز قلات او ټولو ولسوالیو په ښوونځیو کې د نیالګیو اېښودلو کمپاین پیل شو.
د زابل د پوهنې رئیس مولوي محمدعثمان حریت وايي چې په مرکز قلات او ولسوالیو کې یې زده کوونکو ته د سالم تدریسي چاپېریال برابرولو په موخه دا کمپاین پیل کړی دی.
هغه زیاته کړه، چې دا کمپاین به د مرکز قلات او ولسوالیو په ۵۰ ښوونځیو کې پلي شي چې پر مهال به یې شاوخوا ۱۰۰۰ نیالګي کېنول شي.
دی وايي، په ښوونځیو کې باغوانان لري چې هغوي د نیالګیو د ساتنې او پالنې چارې به مخ ته وړي.
نوموړی زیاتوي چې په ښوونځیو کې د نیالګیو اېښودل او د شنې ساحې برابرول، زده کوونکي لا ښې زده کړې ته هڅوي او د هغوی روغتیا تضمینوي.
دغه راز په دایکندي ولایت کې هم د استقلال او سرسبزي تر سرلیک لاندې د نیالګیو اېښودلو کمپاین پیل شو.
د دغه ولایت د کرنې او مالدارۍ رییس شېراحمد رفیع پژواک اژانس ته وویل چې د دغه کمپاین په لړ کې به څلور زره مېوه لرونکي او بې مېوې نیالګي کېنول شي.
هغه زیاته کړه، دا نیالګي په وړیا توګه کروندګرو ته ورکول کېږي څو ټول د دغه ولایت په سمسورتیا کې برخه واخلي.
د ادو شوو ولایتونو اوسېدونکي د نیالګیو د اېښودلو د کمپاین هرکلی کوي او وايي حکومت دې د نیالګیو په ساتنې او پالنه کې له خلکو سره همکاري وکړي.
د هېواد په بېلابېلو ولایتونو کې د نیالګیو اېښودلو کمپاین په داسې حال کې پیل شوی چې د ژمي موسم په خلاصېدو دی او د پسرلي راتګ ته څو ورځې پاتې دي.
Views: 54
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن