لغمان کې ۲۵۰ کسانو ته د غنمو په بدل کې د کار زمینه برابره شوه

[restrict paid="true"]

مهترلام (پژواک، ۲۵ کب ۱۴۰۰): د لغمان د مرکز مهترلام ښاروالۍ له خوا د نهر سراج پاکولو چارې نن پيل شوې او ۲۵۰ کسانو ته په کې د کار زمینه برابره شوه.

د دغه ولايت د ښاروالۍ مرستيال حاجي عبدالطیف پژواک خبري اژانس ته وويل چې د پاک کارۍ دغه کار په درېیو میاشتو کې بشپړېږي چې د ورځې به د کار په بدل کې هر عادي کارګر ته لس کيلو، سر کاريګر ته ۱۴ کيلو او انجنير ته ۱۶ کيلو غنم ورکول کېږي.

د شمس الرحمن په نوم يوه کاريګر پژواک ته وويل: "خوښ یم چې هم خپلو بچيانو ته نفقه پيدا کوم او هم خپل وطن ته کار کوم."

هغه دغه راز زیاته کړه چې حکومت دې وزګارو خلکو ته د کار دا ډول نور فرصتونه هم برابر کړي.

د يادونې ده، نهرسراج چې د الینګار ولسوالۍ په چمچار سیمه کې دی، لس کيلومتره اوږدوالی لري.

[/restrict]