کابل (پژواک، ۳ وری ۱۴۰۱): ملګرو ملتونو، د بښنې نړیوال سازمان، یوناما، افغانستان لپاره د امریکا او جرمني سفارتونو افغانستان کې له شپږم ټولګي پورته د نجونو ښوونځیو د نه پېلېدو په تړاو اندېښنه څرګنده کړې ده.
باختر دولتي اژانس نن سهار (وري ۳مه) د پوهنې وزارت په حواله اعلان وکړ، د نجونو د لېسې او متوسطې دورې ټول ښوونځي به تر امر ثاني پورې تړلي وي.
سرچینه زیاتوي:«هر کله چې د شریعت او افغاني دود او کلتور سره سم د ښوونځي جامې طرحه شي، هغه مهال به د اسلامي امارت د رهبرۍ له حکم سره سم دغه ښوونځي پیل شي.»
په ورته وخت کې د پوهنې وزارت ویاند عزیزاحمد ریان نن کابل کې د ۱۴۰۱ هـ ش ښوونیز کال د پېل په مراسمو کې وویل، له شپږم ټولګي څخه پورته د نجونو ښوونځي تر راتلونکي خبر، د نجونو بشپړ امنیت ټینګښت لپاره د پراخې طرحې تر جوړولو، د ښځو استادانو بشپړېدو او د حجاب مراعاتولو پورې تړلي پاتې کېږي.
هغه زیاته کړه، دا تصمیم د تبعیضي مسایلو له امله نه، بلکې د یادې طرحې د جوړېدو په دلیل نیول شوی دی.
نوموړي وویل، په دې اړه وروستی تصمیم به د «اسلامي امارت د مشرتابه» له خوا نیول کېږي.
دې پرېکړې نړیوال غبرګونونه راپارولي دي.
افغانستان کې د ملګرو ملتونو مرستندیوه پلاوي (یوناما) نن یوه ټویټ کې ویلي: ((افغانستان کې د ملګرو ملتونو سازمان، له شپږم ټولګي پورته د نجونو د ښوونځیو د تړلي پاتې کېدو په اړه د طالبانو پر نننۍ اعلامیه اندېښنه څرګندوي.))
افغانستان لپاره د ملګرو ملتونو د سرمنشي ځانګړې استازې دبورا لاینز ویلي:(( په دې اړه د اندېښمنوونکو راپورونو اورېدل چې له شپږمه پورته ټولګیو نجونې د چارواکو له خوا ښوونځي ته نه غوښتل کېږي، که سم وي لامل یې څه کېدای شي؟))
په ورته وخت کې د بښنې نړیوال سازمان یوه ټویټ کې د نجونو د ښوونځیو د پیلېدو په تړاو د سرپرست حکومت د تصمیم پر بدلون اندېښنه څرګنده کړې او لیکلي یې دي: ((په دې اړه چې تر شپږم ټولګي پورته نجونې په درسي ټولګیو کې د ناستې اجازه نه لري، د اندېښنې وړ راپورونه خپرېږي.))
دغه راز د افغانستان لپاره د امریکا سفارت شارژدافیر (یان مککري) په یوه ټویټ کې په دې اړه اندېښنه ښودلې او لیکلي یې دي: ((دا ډېره ناهیلې کوونکې او د طالبانو له ډېرو څرګندونو او ضمانتونو سره په مخالفت کې ده؛ د افغانستان ټول ځوانان د تحصیل حق او وړتیا لري.))
دغه راز کابل کې د جرمني سفیر پوتزل مارکوس یوه ټویټ کې لیکلي: ((د نن سهار هغه راپورونو چې له شپږمه پورته ټولګيو نجونو د ښوونځي پیلېدل دې تر امر ثاني پورې وځڼدول شي، د اندېښنې وړ دي. دا ضربه ټولو هغو افغانو نجونو ته ده چې غواړي ښوونځي او پوهنتونونو ته لاړې شي او د کار پیدا کولو لپاره تحصیل وکړي.))
هغه وايي: ((دغه کړنلاره د افغان حکومت د چارواکو له رسمي اعلامیو او هغو نړیوالو کنوانسیونونو سره په ټکر کې ده، چې افغانستان منلی دی.))
دا غبرګونونه داسې مهال څرګندېږي چې له دې مخکې د افغانستان پوهنې وزارت اعلان کړی و چې د نوي تعلیمي کال له پېلېدو سره، د وري په دریېمه به د ټولو زده کوونکو پر مخ ښوونځي پرانیستل شي.
د پوهنې وزارت دا تصمیم له داخلي او بهرنیو هرکلیو سره مخ شوی و.
Views: 156
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن