کابل (پژاوک، ۲۱ وری ۱۴۰۱): په کابل کې د ایران سفارت له افغانانو سره د ایراني نظامیانو او وګړو د ناسم چلند اړوند ویډیوګانو او تصویرونو خپرېدل بې اساسه بولي او وايي، دغه ډول ویډیوګانې او تصویرونه د دواړو هېوادونو ترمنځ د اړیکو خرابېدو په موخه خپرېږي.
خو د پژواک د یوه راپور له مخې، په ایران کې مېشت یو شمېر افغانان له افغان اتباعو سره د ایراني نظامیانو او وګړو د ناسم چلند او شکنجې شکایت کړی، ویلي یې دي چې په وروستیو ورځو کې هيڅ افغان له کوره بهر نه شي وتلای.
په دې وروستیو کې په ټولنیزو شبکو کې داسې ویډیوګانې او تصویرونه خپرېږي چې ښيي ایراني نظامیان او وګړي یو شمېر افغان کډوال شکنجه کوي او سپکاوی یې کوي.
له افغان کډوالو سره د ایراني پولیسو او وګړو ناسم چلند هغه مهال پیل شو چې پنځه ورځې مخکې په امام رضا حرم کې د یوه افغان له خوا د دوو ایراني ماشومانو د وژلو راپور خپور شو.
خو په کابل کې د ایران سفارت په یوه خبرپاڼه کې لیکلي، ښکاره ده چې له افغان کډوالو سره د ایراني سرحدي ځواکونو د سازمان شوي ناسم چلند په اړه خپاره شوي خبرونه او اطلاعات بې اساسه دي او باور نه شي پرې کېدای.
دغه سفارت زیاته کړې، څرګنده ده چې دغه ډول فیلمونه، کلېپونه او تصویرونه نه شي کولای په ایران کې له افغان کډوالو سره د چلند اړوند عادلانه قضاوت وښيي.
د دې خبرپاڼې په دوام کې راغلي: ((بلخوا په مجازي فضا کې داسې فیلمونه او کلېپونه خپاره شوي چې په ایراني ټولنه کې د افغاني ضد روحیه پیاوړې کوي، په دې ویډیوګانو کې افغانان د ایران د خلکو پر وړاندې د جرم او جنایت مرتکب کېږي.))
په کابل کې د ایران سفارت پر ځینو رسنیو د نیوکې ترڅنګ وايي، د دغه ډول فیلمونو خپرېدل هغه هدفي رسنۍ رسوا کوي چې د دواړو هېوادونو ترمنځ د اړیکو خرابولو په هڅه کې دي.
د دغه سفارت په خبره، په ایران کې د افغان کډوالو د ځورونو په تړاو په مجازي فضا کې په هدفي او پلان شوې بڼه خپاره شوي کلېپونه د ایران او افغان ملتونو د تاریخي، ژورو او قوي اړیکو د زیانمنېدو هڅه وه او دا په افغان ټولنه کې د ایراني ضد روحیې د پیاوړې کېدو لپاره کېږي.
په کابل کې د ایران سفارت ویلي، د افغانستان او افغانانو پر وړاندې د ایران ټولیز سیاست د متقابل درناوي او ښه ګاونډیتوب پر اصل ولاړ دی، د دغه ډول بې اساسه خبرونو خپرېدل د دواړو هېوادونو په اړیکو کې د دسیسې او فتنې ښکارندویي کوي.
د یاد سفارت په خبره، له ۴۰ کلونو ډېر وخت کېږي چې ایران په ډېر ښه ډول د افغان کډوالو کوربه و او اوس مهال هم د شاوخوا پنځه میلیون افغان کډوالو کوربه توب کوي چې په عمومي ډول په ایران کې د ایراني اتباعو په څېر له شته امکاناتو برخمن دي.
د سفارت په خبره، په افغانستان کې وروستي بدلونونه د دې لامل شوي چې د افغانانو تازه څپه ایران ته راشي، خو ایران د ظالمانه بندیزونو له امله د اقتصادي ستونزو سربېره د افغانانو د راتګ پر وړاندې هيڅ خنډ نه دی جوړ کړی، دغه راز نور کډوال هم مني.
دغه سفارت وايي، په افغانستان کې د ایران استازولی چې په کابل کې سفارت، هرات، کندهار، جلال اباد او مزارشریف کې قونسلګرۍ په کې شامل دي، له رخصتۍ پرته هره ورځ د ویزې صادرېدو اقدام کوي.
خبرپاڼه کاږي، هغه افغانان چې ایران ته د سفر هوډ لري، کولای شي یادې هرې استازولۍ ته د ویزې اخیستو لپاره لاړ شي او په قانوني ډول ایران ته سفر وکړي.
د خبرپاڼې په بله برخه کې په ناقانونه ډول ایران ته تګ د دغه هېواد له ځمکنۍ بشپړتیا څخه د سرغړونې په معنا یاد شوی او د ایران سرحدي ځواکونه د دغه هېواد خاورې ته د ټولو پردیو اتباعو د داخلېدو د مخنیوي په برخه کې مسوول ګني.
Views: 14
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن