[restrict paid=”true”]
کابل (پژواک، ۱۸ غویی ۱۴۰۱): د ملګرو ملتونو د یوناما دفتر د حجاب په اړه د افغانستان د سرپرست حکومت نوې طرحه له نړیوالې ټولنې سره د دغه حکومت له ژمنو سرغړونه بولي او ځينو نورو بهرنيو سرچينو هم پر دغې طرحې نيوکې کړې دي.
دغه راز امریکايي او د اروپايي اتحاديې چارواکو ويلي چې د افغانستان اوسنی حکومت د دې پر ځای چې اقتصادي او نورو ستونزو ته پام وکړي، د ښځو اړوندو مسايلو ته يې مخه کړې ده. د بشري حقونو د څار سازمان يوې چارواکې بیا ويلي چې د افغانستان اوسنی حکومت ښځې خپلواکۍ ته نه پرېږدي.
د افغانستان سرپرست حکومت تېره ورځ د شرعي حجاب لپاره توضيحي او تطبيقي طرحه اعلان کړه.
په طرحه کې راغلي: «بدن چې په هره جامه پټ کړل شي حجاب ګڼل کېږي، خو چې باریکه نه وي چې بدن ترې ښکاري او دومره تنګه نه وي چې د بدن د غړو نمایندګي کوي.»
په طرحه کې راغلي، هغه ښځې چې د عمر په لحاظ زړې یا وړې نه وي، له نامحرمو نارینه وو سره د مخامخېدو پر مهال به د شرعي هدایاتو مطابق له سترګو پرته خپل مخ ضرور پټوي.
دغه راز په طرحه کې زياته شوې چې بې حجابه مېرمنې دې په لومړي ځل کور معلوم کړل شي، د هغې ولي ته دې توصیه وشي او تنبیه دې کړل شي؛ د بیا سرغړونې په صورت کې په دوهم ځل دې ولي اړوند ریاست ته احضار کړل شي، په درېیم ځل دې ولي درې ورځې بندي کړل شي، په څلورم ځل دې ولي محاکمو ته وسپارل شي، څو په مناسبه سزا محکوم شي.
په کابل کې د ملګرو ملتونو دفتر یوناما په دې اړه اندېښنه څرګنده کړې، وایي، دا پریکړه د ښځو او نجونو په ګډون د ټولو افغانانو د بشري حقونو د درناوي او ساتنې په اړه د هغو ګڼ شمیر تضمینونو سره په ټکر کې ده چې د طالبانو د استازو له خوا په تیره لسیزه کې د بحثونو او خبرو په ترڅ کې نړیوالې ټولنې ته ورکړل شوي دي.
یوناما ویلي: “دغه ډاډ واک ته د ۲۰۲۱ کال په اګست مياشت کې د طالبانو له رسیدو وروسته هم تکرار شو، چې ښځو ته به د کار، تعلیم او یا هم په پراخه کچه په ټولنیزه برخه کې دهغوی حقونه ورکړل شي.”
په خبرباڼه کې راغلي، نړیواله ټولنه داسې سګنالونو ته لیواله ده چې د افغانستان اوسنی حکومت له ټولې نړۍ سره مثبتو اړیکو ته چمتو دی. سرچینه زیاتوي چې شپږ اونۍ وړاندې منځنيو ښوونځيو ته د افغان نجونو د ورتګ د ځنډولو پریکړه په نړیواله، سیمه ییزه او د منطقې په کچه په پراخ ډول وغندل شوه او د حکومت د نن ورځې پریکړه ښايي له نړیوالې ټولنې سره اړیکې نورې هم ترینګلې کړي.
د خبرپاڼې له مخې، یوناما به سمدلاسه له اوسنیو واکمنو چارواکو سره د ناستو غوښتنه وکړې ترڅو د دغې پریکړې د دريځ په اړه نوره روښانتيا ترلاسه کړي. یوناما لیکي چې د نړیوالې ټولنې له غړو سره به هم د دې پریکړې د اغیزو په اړه سلا مشورې وکړي.
د ملګرو ملتونو سرمنشي انټوني ګوتريش پر خپله ټويټرپاڼه یو ځل بیا د افغانستان له سرپرست حکومته غوښتنه کړې ده چې له افغان ښځو او نجونو سره پر خپلو ژمنو و درېږي او د بشري حقونو د نړیوالو قوانینو له مخې دې په دې برخه کې خپلې ژمنې عملي کړي.
په ورته وخت کې د افغان نجونو، ښځو او د بشري حقونو لپاره د امریکا د بهرنیو چارو وزارت ځانګړې استازې رینا امیري هم لیکلي: «طالبان د دې پر ځای چې اقتصادي ناورین پای ته ورسوي او ټولګډون حکومت جوړ کړي، د ښځو او نجونو ځپلو ته دوام ورکوي.»
په افغانستان کې د اروپایي اتحادیې د استازولۍ مشر وان برانټ هم پر خپله ټويټرپاڼه لیکلي، پر ځای د دې چې د افغانستان سرپرست حکومت واقعي ستونزو لکه خوړو، روغتیا، تعلیم او اقتصاد ته پام وکړي، د ښځو حجاب ورته مهم ښکاره شوی دی.
د بشري حقونو د څار سازمان کې د ښځو د حقونو څانګې مرستیالې هیدربار پر خپله ټويټرپاڼه لیکلي: «طالبان غواړي چې ښځې هيڅ خپلواکي ونه لري؛ نړۍ چې دې پرېکړې ته څه ډول غبرګون ښيې، دا په ټوله نړۍ کي د ښځو پر حقونو اغېز لري.»
د افغانستان سرپرست حکومت تر اوسه دغو څرګندونو ته غبرګون نه دی ښودلی، خو تر دې وړاندې یې ویلي چې د شریعت په چوکاټ کې د ښځو ټولو حقونو ته ژمن دي.
د حجاب په اړه د طرحې د اعلان په خبري غونډه کې د امربالمعروف، نهي عن المنکر او شکایتونو اورېدو وزارت سرپرست شیخ خالد حنفي وویل چې د حجاب په تړاو فرمان یو قانون دی او باید پلى شي.
نوموړی وایي چې په تدریج سره به د منکراتو مخنیوی کوي؛ خو د حجاب رعايت کولو ته ځانګړې پاملرنه کوي.
هغه زیاته کړه، اسلامي امارت نه غواړي چې پر خلکو حجاب په زور عملي کړي، خو د نصيحت له لارې بايد دغه کار وشي.
د اسلامي امارت ویاند ذبیح الله مجاهد د طرحې د اعلان په پرونۍ ناسته کې وویل چې د حجاب دغه طرحه به په ډېر احتیاط سره پر خلکو پلې شي او په دې اړه به څوک نه ګواښل کېږي.
دی وایي، په هېواد کې ۹۹ سلنه ښځې په خپله حجاب پر ځان تطبیقوي او پاتې یو سلنه به هم وهڅول شي چې حجاب مراعت کړي.
[/restrict]
Views: 136
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن