«پولیس باید د یونیفورم تر وېش وروسته پر چیک‌پاینټونو په شخصي جامو کې ونه درېږي»

کابل (پژواک، ۲۶ غبرګولی ۱۴۰۱): د کابل امنیه قومانداني وایي، د پولیسو یونیفورم د وېش له بشپړېدو وروسته هیڅ پولیس حق نه لري چې پر چیک‌پاینټونو په شخصي جامو کې ودرېږي.

کورنیو چارو وزارت د روانې غبرګولي میاشتې په ۱۸ مه د پولیسو نوی یونیفورم معرفي کړ. دغه وزارت په همدغه ورځ په کابل او کندهار ولایتونو کې د نوي یونیفورم د وېش د پیل خبر ورکړ او زیاته یې کړه چې واحد یونیفورم د نظم او ډسپلین ښکارندوی دی او د امنیتي پېښو په مهارولو کې هم مرسته کولای شي.

د کابل امنیه قوماندانۍ نن (د غبرګولي ۲۶مه) د  خبرپاڼې په خپرولو سره ویلي چې تېره ورځ د کابل د امنیه قوماندان ولي‌جان حمزه په مشرۍ د امنیتي ارګانونو ترمنځ د ښه امنيت او نظم راوستلو په پار غونډه جوړه شوه.

د سرچینې د معلوماتو له مخې، په دې غونډه کې د ځانګړو سپارښتنو او لارښونو ترڅنګ د یونیفورم د ځانګړتیاوو پر اهمیت هم خبرې وشوې.

سرچینې لیکلي چې د امنیه قوماندان له لوري یادو چارواکو ته هدایت ورکړل شو چی د مشرانو له خوا ټاکل شوی یونیفورم باید له توزیع وروسته په جدي توګه عملي شي.

خبرپاڼه کې راغلي چې په ناسته کې لارښوونه وشوه چې هیڅ پولیس حق نه لري چې د یونیفورم د توزیع له بشپړېدو وروسته د پولیسو پر چېک‌پاینټونو په شخصي جامو کې ودرېږي.

دا په داسې حال کې ده چې دا مهال پولیس بېلابېل ډول پوځي او ملکي جامې اغوندي.