تخار کې په وروستۍ یوه اوونۍ کې ۲زره ماشومان پر اسهال اخته شوي

تالقان (پژواک، ۱۸ زمری ۱۴۰۱): د تخار د روغتیا مسوولین وایي، په وروستۍ یوې اوونۍ کې د دغه ولایت په اشکمش او بنګي ولسوالیو کې د اسهال پر ناروغۍ د اخته ماشومانو شمېر ۲۰۰۰ ته رسېږي.

د تخارد عامې روغتیا رییس ډاکټر عبدالقهار احمدي پژواک خبري اژانس سره په خبرو کې وویل، په اشکمش او بنګي ولسوالیو کې د څښاک پاکو اوبو د نشتون له امله پر اسهال د اخته ماشومانو شمېر د زیاتېدو په حال کې دی.

هغه وايي چې د عامې روغتیا ریاست ګرځنده ټيمونه په یادو دوو ولسوالیو کې د دغې ناروغۍ د درملنې او مخنیوي په هڅو کې دي.

احمدي زیاتوي، ارزونې ښیي چې په وروستۍ یوه اوونۍ کې په یادو دوو ولسوالیو کې ۲زره ماشومان د اسهال پر ناروغۍ اخته شوي دي.

د عامې روغتیا د رییس په خبره، د یادو دوو ولسوالیو خلک له کلونو راهیسې د څښاک له پاکو اوبو څخه بې‌برخې دي او اوس د دې لپاره چې د یادې ناروغۍ مخنیوی وشي، د یونیسف او اغاخان ادارو ته د همکارۍ غوښتلو وړاندیزونه سپارل شوي څو په دغو ولسوالیو کې د پاکو اوبو په برخه کې همکاري وکړي.

په دغه حال کې، د تخار ولایت ځيني اوسېدونکي د یادې ناروغۍ له ډېرېدو اندېښمن دي او د عامې روغتیا ریاست له مسوولینو په دې برخه کې د جدي پاملرنې غوښتنه کوي.

په تخار کې مدني فعال محمد یاسین نوري وایي، په تېرو ۲۰ کلونو کې د دغه ولایت ډېری خلک د څښاک له پاکو اوبو بې‌برخې ول او له همدې امله ماشومان پر بېلابېلو ناروغیو اخته کېږي.

نوري وایی چې د اوړي سختې ګرمۍ او د خلکو بد اقتصادي وضعیت ته په کتو، که د اسهالاتو ناروغۍ د چټک خپرېدو مخنیوی ونه شي، ډېر ماشومان به پرې اخته شي چې ښايي یوه غمیزه رامنځ ته کړي.

دا په داسې حال کې ده چې د څښاک پاکو اوبو څخه استفاده نه کول، د حفظ الصحې نه مراعتول او ګرمه هوا د یادې ناروغۍ عمده لاملونه ګڼل شوي دي.