کابل (پژواک، ۲۹ زمری ۱۴۰۱): په هېواد کې له سیاسي بدلون را وروسته د کابل ښار د اوولسمې ناحیې برېښنايي تذکرو د وېش څانګې څه باندې ۴۲زره تذکرې وېشلې او له دغه مدرکه یې ۱۴ میلیونه افغانۍ عواید راټول کړي دي.
دغه څرګندونې نن د یادې ادارې ویاند محمدحلیم رافع رسنیو ته په استولي پیغام کې کړې دي.
د ده په وینا، د کابل ښار د اوولسمې ناحیې د الکترونیکي تذکرو وېش څانګې د خپلو فعالیتونو له بیا پیل راهیسې، د الکترونیکي تذکرو ۴۵زره غوښتنلیکونه طیمراحل کړي او نږدې ۴۲زره چاپ شوې تذکرې یې پر غوښتونکو وېشلې دي.
سرچینې لیکلي، دغې ادارې د وېشل شوو ۴۲زره برېښنايي تذکرو له مدرکه ۱۴ میلیونه افغانۍ عواید د دولت خزانې ته سپارلې دي.
د سرچینې د معلوماتو له مخې، د تذکرو وېش دغه څانګه د ۴۸ کارکوونکو په لرلو سره د نارینه او ښځینه په دوو جلا برخو کې په ورځني ډول شاوخوا ۱۵۰۰ غوښتونکو ته د نوملیکنې، بایومټریک او وېش خدمتونو د وړاندې کولو وړتیا لري.
خبرپاڼه کې راغلي چې د الکترونیکي تذکرو په دې څانګه کې د نویو تذکرو د وېش ترڅنګ، له وېش وروسته خدمتونو برخه هم فعاله ده چې هېوادوالو ته د کورنۍ د نوي غړي د ثبت، د کورنۍ د پاتې غړو د ثبت، د زېږون او واده د ثبت او مثنی تذکرو د ورکړې خدمتونه وړاندې کوي.
دا په داسې حال کې ده چې پژواک د روانې زمري میاشتې په لسمه یو راپور خپور کړ چې د کارتونو د نهشتون له امله برېښنایي تذکرې تر نوي امر پورې نه وېشل کېږي، خو د غوښتونکو د هویت تثبیت، بایومټریک او نور پړاوونه ترسره کېږي.
په هېواد کې د برېښنايي تذکرو وېش د ۱۳۹۷ لمریز کال د غویي په ۱۳مه پیل شوی دی.
د احصايې ملي ادارې د معلوماتو پر بنسټ، تر اوسه په ټول هېواد کې څه باندې ۸،۲ میلیون کسانو ته تذکرې وېشل شوې او له دې ډلې څه باندې ۲،۱ میلیون کسانو ته په افغانستان کې له سیاسي بدلون وروسته وېشل شوې دي.
Views: 101
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن