سمنګان کې چاودنه؛ ۱۵ کسان وژل شوي او ۲۴ ټپیان دي

ایبک (پژواک، ۹ لېندۍ ۱۴۰۱): د سمنګان په مرکز ایبک کې په یوې مدرسې کې چاودنه شوې چې له امله یې ۱۵ کسان وژل شوي او ۲۴ نور ټپيان دي.

پېښه نن ماسپښین شاوخوا یوه بجه، د ایبک ښار اړوند پر بندر سړک په «الجهادیه» مدرسه کې د لمانځه پر مهال شوې ده.

د سمنګان د امنیې قوماندانۍ ویاند منیر رحیمي پېښه تاييدوي، خو وايي چې نور جزیات به یې وروسته شریک کړي.

خو د ولایتي روغتون یوه مسوول ډاکټر محمدالله مرادي پژواک خبري اژانس ته وویل، د پېښې له ځایه ۱۵ جسدونه او ۲۴ ټپيان ور وړل شوي چې په ټپیانو کې د ۸ کسانو روغتیايي حالت ښه نه دی.

دی وايي، په وژل شوو او ټپیانو کې د مدرسې مسوولین او زده‌کوونکي شامل دي.

د ده په خبره، روغتون ته د وروړل شوو ټپیانو له حالته داسې ښکاري چې ګواکې دغه برید ځانمرګی وي.

خو تر اوسه رسمي سرچینو په دې اړه څه نه دي ویلي.