کابل کې د چين سفیر: د سفارت امنيت ته دې پاملرنه زیاته شي

کابل (پژواک، ۲۰ لېندۍ ۱۴۰۱): په کابل کې د چين سفير له سرپرست حکومت څخه غوښتي چې د دغه هېواد سفارت امنيت ته پاملرنه لا زياته کړي.

د بهرنیو چارو وزارت ویاند عبدالقهار بلخي په خپله ټویټرپاڼه کې ویلي چې نن په کابل کې د چین سفیر وانګ یو د بهرنیو چارو وزارت سیاسي مرستیال شېر محمد عباس ستانکزي سره وکتل او د علاقې وړ موضوعاتو په اړه یې ورسره خبرې وکړې.

سرچينه کاږي، د چین سفیر په افغانستان کې له سرتاسري امنیت څخه خوښي څرګنده کړه او له اسلامي امارت څخه یې وغوښتل چې په کابل کې د دغه هېواد د سفارت امنیت ته لا زیاته پاملرنه وکړي.

د سرچينې په حواله، ستانکزي د چین سفیر ته ډاډ ورکړ چې اسلامي امارت به هېچا ته اجازه ورنه کړي چې د افغانستان خاوره د بل هېواد پر ضد وکاروي او زیاته یې کړه چې په افغانستان کې د بهرني سیاسي استازو د امنیت تأمین د اسلامي امارت لومړیتوب دی.

د ده په وینا، ستانکزي د افغانستان له خلکو سره د چین له بشري مرستو څخه د مننې کولو په ترڅ کې له یاد هېواد سره د اقتصادي اړیکو پر پیاوړتیا او پراختیا ټینګار وکړ.