<p style="text-align: justify;">[restrict paid="true"]</p>
<p style="text-align: justify;">کابل (پژواک، د مرغومي لومړۍ نیټه ۱۴۰۱): د لوړو زده کړو سرپرست وزیر مولوي ندا محمد ندیم وايي، د نجونو زده کړې په برخه کې یو شمېر ستونزه شته، چې دوی یې د بنسټیز حل په لټه کې دي او کله چې دغه ستونزې حل شي، نو دوی به د نجونو پرمخ د پوهنتونونو دروازې بېرته خلاصې کړي.</p>
<p style="text-align: justify;"> هغه له ملي راډیو تلویزیون سره تېر ماښام د خپلې ځانګړې مرکې په ترڅ کې د دې مطلب په بیانولو سره زیاته کړه، په تېرو ۱۴ میاشتو کې د اناثو د زده کړو په ډګر کې منکرات موجود وو او له همدې امله یې پوهنتونونو کې د زده کړو د ځنډلو پرېکړه کړې ده.</p>
<p style="text-align: justify;">ندیم وویل، تېر کال د نوي حکومت له راتګ څخه تر دې دمه یې پوهنتونونو کې د اصلاح لپاره صبر وکړ، خو دا چې دغه ستونزې حل نه شوې؛ نو د نجونو پر تحصیل یې د بندېز پرېکړه وکړه.</p>
<p style="text-align: justify;">هغه زیاته کړه، په پوهنتونونو کې د لیلیو او دغو لیلیو ته له نورو ولایتونو څخه د نجونو ورتګ کې هم ستونزې وې، ځکه پر لاره ورسره د سفر کولو پر مهال محرم کس نه و.</p>
<p style="text-align: justify;">د لوړو زده کړو وزیر وایي، ښځینه محصلینو پوره حجاب عملي نه کړ او په هغه ډول پوهنتونونو ته تللې، لکه واده ته چې ځي.</p>
<p style="text-align: justify;">مولوي ندا محمد ندیم زیاته کړه، دغه راز پوهنتونونو ته د هلکانو او نجونو ګډ تګ راتګ لا هم نه وو بند شوی.</p>
<p style="text-align: justify;">دی وايي، په پوهنتونونو کې د نصاب ستونزې هم وې چې ځیني یې د نجونې لپاره نه دي جوړې شوې، لکه د هندسې او زراعت څانګې زده کړې چې نجونې ورته اړتیا نه لري.</p>
<p style="text-align: justify;">د نوموړي په وينا، نجونې کولی شي مدرسو ته ولاړې شي، تراوسه د مدرسو په اړه کومه پرېکړه نه ده شوې؛ که هلته دغه ستونزې پیدا شي، هغه به هم وتړل شي.</p>
<p style="text-align: justify;">ده وویل، یادو ستونزو ته د بنسټیز حل په لټه کې دي او د حل لار ورته پیدا کوي.</p>
<p style="text-align: justify;">د هغه په وینا، دوی له افغان ښځو او زده کړو سره ستونزه نه لري او هر کله چې دغه ستونزې حل شي، نو د پوهنتونونو دروازې به بېرته خلاصي کړي.</p>
<p style="text-align: justify;">شیخ ندیم پر نړۍوالو غږ وکړ چې د دوی په داخلي چارو کې دې کار نه لري، دوی د خپلو خلکو لپاره قربانۍ ورکړې دي او د ولس ملاتړ ورسره دی.</p>
<p style="text-align: justify;">[/restrict]</p>
