کلات (پژواک، ۲۸ کب ۱۴۰۱): د کورنیو چارو وزارت له نشهيي توکو سره د مبارزې معینیت یوه پلاوي زابل ته سفر وکړ او له ځايي مسوولینو یې د نشهيي توکو د کر او قاچاق مخنیوي په برخه کې د پاملرنې او همکارۍ غوښتنه وکړه.
له نشهيي توکو سره د مبارزې معینیت اړوند له نشهيي توکو سره د مبارزې رییس مولوي محمدالله احمدي په زابل ولایت مقام کې جوړې شوې غونډې ته وویل، د کورنیو چارو وزارت، دفاع وزارت، استخباراتو عمومي ریاست او کرنې وزارت له لوري ګډ پلان جوړ شوی چې له مخې به یې، په ټول هېواد کې د نشهيي توکو کښتونه له منځه یووړل شي.
هغه زیاته کړه، د اسلامي امارت د مشرتابه له فرمان سره سم به له هغو کسانو سره هم قانوني چلند وشي چې نشهيي توکي کري.
نوموړي د ولایت له ځايي مسوولینو وغوښتل چې په دې برخه کې ورسره همکاري وکړي.
د زابل مرستیال والي سلېمان اغا بهیر وویل، د دغه ولایت ځايي مسوولینو د نشهيي توکو د کر او قاچاق مخنیوي په برخه کې د مشرتابه فرمان تطبیق کړی او چا ته یې اجازه نه ده ورکړې چې کوکنار او یا نور نشهيي توکي وکري.
هغه زیاته کړه، په دې وروستیو کې یې د ولسوالانو په کچه تغییر او تبدیل راوستی څو د نشهيي توکو د مخنیوي فرمان ښه تطبیق او د مکافات او مجازاتو اصل عملي شي.
خو هغه غوښتنه وکړه چې د یاد ولایت کروندګر ډېر بېوزلي دي، د کوکنارو نه کرلو په بدل کې دې بدیل معیشت ورته برابر شي.
نوموړي وویل: «د بدیل معیشت په توګه دې د اوبو پر مهارولو کار وشي، بندونه دې جوړ شي، له کروندګرو سره دې د اصلاح شوو تخمونو او کېمیاوې سرې مرستې وشي، د زابل اقلیم ته په کتو دې د انجې او نورو کرنیزو توکو پر ترویج کار وشي.»
د زابل امنیه قوماندان قاري صلاحالدین ایوبي وویل، د نورو امنیتي ارګانونو په ملتیا یې د دغه ولایت په بېلابېلو سیمو کې د کوکنارو کښتونو د له منځه وړلو عملیات کړي دي.
هغه زیاته کړه، تر دې مهاله یې د مرکز کلات ترڅنګ په دایچوپان او ارغنداب ولسوالیو کې لس نیم جریبه ځمکه د کوکنارو له کښته پاکه کړې ده.
نوموړي له ملکي ادارو هم غوښتنه وکړه چې د کوکنارو د کښت په مخنیوي کې مرسته ورسره وکړي
Views: 81
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن