<p style="text-align: justify;">کابل (پژواک، ۱۷ وری ۱۴۰۲): د ماشومانو خوندیتوب ادارې، د ناروې کډوالو شورا او د ډنمارک کډوالو شورا نړۍوالو بنسټونو له اسلامي امارته غوښتي چې د ملګرو ملتونو په ادارو کې د ښځو پر کار لګول شوی بندیز دې لرې کړي.</p>
<p style="text-align: justify;">یادو بنسټونو نن (پنجشنبه) د یوې ګډې <a href="https://www.nrc.no/news/2023/april/joint-ingo-statement-ban-on-women-aid-workers-in-afghanistan-must-be-lifted/">خبرپاڼې</a> په خپرولو سره ویلي، بشردوستانه بنسټونه له ښځینه کارکوونکو پرته د ښځو او نجونو ستونزو ته په اغېزناک ډول رسېدنه نه شي کولی.</p>
<p style="text-align: justify;">په یاده خبرپاڼه کې زیاته شوې چې په افغانستان کې له ۲۸ میلیون ډېر خلک جدي مرستو ته اړتیا لري او د ښځو پر کار بندیز به خلک ناهیلي کړي.</p>
<p style="text-align: justify;">دغهراز یادو بنسټونو له اسلامي امارته د دغو بندیزونو د لرې کولو غوښتنه کړې او ویلي، ښځو ته باید دندو ته د تلو اجازه ورکړل شي.</p>
<p style="text-align: justify;">دا په داسې حال کې ده چې په افغانستان کې د ملګرو ملتونو استازولۍ دفتر دوې ورځې مخکې په یوه <a href="https://twitter.com/UNAMAnews/status/1643233319180464135?ref_src=twsrc%5Etfw%7Ctwcamp%5Etweetembed%7Ctwterm%5E1643233319180464135%7Ctwgr%5E5a13a7b37988b8e813b50ef89e5c2f9705c6fa5a%7Ctwcon%5Es1_&ref_url=https%3A%2F%2Fpajhwok.com%2Ffa%2F2023%2F04%2F05%2Funited-nations-local-authorities-in-nangarhar-have-prevented-female-unama-employees-from-working%2F">ټوېټ</a> کې ویلي وو چې د اسلامي امارت سیمهییز مسوولین د دغې ادارې ښځینه کارکوونکو ته دفترونو ته د تګ اجازه نه ورکوي.</p>
<p style="text-align: justify;">له دغو ممنوعیتونو وروسته، یوناما په افغانستان کې خپلو ۳۳۰۰ کارکوونکو ته -چې ۴۰۰ یې ښځینه دي- امر وکړ چې راتلونکې ۴۸ ساعتونه دې خپلو دندو ته نه ځي او د چهارشنبې په ورځ یې دغه امر تر نامعلومې مودې وغځاوه.</p>
<p style="text-align: justify;">خو د اسلامي امارت ویاند ذبیحالله مجاهد رسنیو ته ويلي چې دا مسله یوازې په ننګرهار کې د یوه څه ستونزې له امله را منځته شوې او د یاد بنسټ نور کارکوونکي په ولایتونو کې خپلو دندو ته دوام ورکوي.</p>
<p style="text-align: justify;"></p>
<p style="text-align: justify;"></p>
