کابل (پژواک، ۳۰ وری ۱۴۰۲): د افغانستان ستره محکمه وايي، د کوچني اختر په مناسبت د هېواد له زندانونو ۲۴۶۰ زندانیان چې د عفوې مستحق وو، خوشي شوي او د ۴۷۱ نور بندیانو د بند موده کې تخفیف راغلی دی.
د افغانستان ستره محکمه نن (د وري ۳۰مه) د یوه ټویټ په خپرولو سره لیکلي: «د افغانستان اسلامي امارت د مشرتابه د عالي مقام او ریاستالوزراء د هدایت پر اساس، د سترې محکمې د رییس او قاضي القضات په حکم د هېواد په کچه ۲۴۶۰ بندیان له زندانونو چې د عفوې مستحق وو خوشي شول او ۴۷۱ نور بندیان چې د تخفیف وړ وو، د بند په موده کې یې تخفیف راغلی دی.»
سرچینې لیکلي: «د هېواد په کچه د بې برخلیکه او بښنې مستحق بندیانو په اړه د معلوماتو لپاره د سترې محکمې عالي شورا د (۶/۹/۱۴۴۴ هجري قمري) نېټې دویمې پرېکړې او ۳۵مې ګڼې تصویب پر اساس ګډ پلاوی جوړ شوی و، د یاد پلاوي له معلوماتو وروسته د بندیانو خوشي کېدو او د یو شمېر نورو د بند په موده کې د تخفیف راوستو پرېکړه وشوه.»
دا په داسې حال کې ده چې هر کال د اخترونو په مناسبت یو شمېر بندیان خوشي کېږي او یا یې د بند په موده کې تخفیف ورکول کېږي.
GET IN TOUCH
NEWSLETTER
SUGGEST A STORY
PAJHWOK MOBILE APP