اسلاماباد (پژواک، ۱۸ غویی ۱۴۰۲): په پاکستان کې مېشت ځیني افغان خبریالان د دغه هېواد د پولیسو له خوا ترې د پیسو له اخیستلو شکایت کوي او وايي، تېره ورځ کله چې د اسلاماباد ښار په یوه سیمه کې د سیاحت لپاره راټول شوي وو نو پولیسو ورڅخه پیسې اخیستې دي.
د یادو خبریالانو له ډلې سیدعیسی وویل: «تېره ورځ کله مو چې غوښتل له G-9-4 څخه د غره لمنې خوا ته ولاړ شو، نو د اسلاماباد پولیسو له موږ نه پیسې واخیستې.»
هغه زیاته کړه، په ټوله کې ۳۰ کسان وو او کله چې پر څلور کسیزو ګروپونو ووېشل شول او د خپلو موټرو په وسیله د غره لمنې ته روان شول نو موټر یې د پاکستاني پولیسو له خو ودرول شول او د پاسپورټ او ویزې غوښتنه ترې وشوه.
نوموړی زیاتوي: «موږ هغه کارتونه چې د پاک- افغان نړۍوال انجمن له خوا راکړل شوي وو، ورته وښودل؛ خو بیا هم پولیسو راڅخه د پنځه زره کلدارو غوښتنه وکړه.»
د هغه په وینا، د پاکستان پولیسو د دوی کارتونو ته اهمیت نه دی ورکړی او ورته یې ویلي چې دغه کارتونه د دوی له نظره رسمیت نه لري.
نوموړي څرګنده کړه: «تر څو چې پولیسو پيسې وانخیستې موږ یې ازاد نه کړو، په ډېرې سختۍ وتوانېدو چې د پنځه زره کلدارو په ورکولو سره ځان ترې خلاص کړو.»
په ورته وخت کې، یو بل خبریال شاهرخ طاهري هم وویل چې افغان خبریالان په پاکستان کې له ډېرو ستونزو سره مخ دي.
هغه زیاته کړې چې د پولیسو له خوا لګول شوو محدودیتونو د خبریالانو او نورو افغانانو ژوند سخت کړی دی.
طاهري زیاته کړې: «له یوې خوا د خبریالانو بېسرنوشتي او بلخوا د ویزو نه تمدید ستونزې او اقتصادي او ټولنیزې ننګونې د دوی فکري او ذهني خپګان ډېر کړی دی.»
د هغه په باور، د دوی پر وړاندې ستونزې ورځ تر بلې زیاتېږي او هیڅ بنسټ د حل لپاره یې اقدام نه کوي.
د افغان خبریالانو پر وړاندې ستونزې او ننګونې یوازې په پاکستان کې نه دي؛ بلکې په ایران کې هم کډوال افغان خبریالان له ورته وضعیت سره مخ دي.
مهناز مهریار چې پخوا په هېواد کې د يوې راډيو مسووله وه او د ازاد خبريالې په توګه یې کار کاوه، وویل: «له څه باندې یو کال راهیسې ایران ته راغلې یم او دلته د ایران په اصفهان ښار کې د ورېښمو اوبدلو په یوه شرکت د کارګرې په توګه کار کوم.»
هغې زیاته کړه، کار یې ستونزمن دی او ځیني وخت د ایران پولیسو له خوا هم له ستونزو سره مخ کېږي.
نوموړې ویلي دي: «نن زموږ کارخونې ته پولیس راننوتل او هغه افغان کارګر یې لټول چې د اوسېدو اسناد یې نه لرل. له دې وېرې چې دوی مې ډیپورټ نه کړي زه په یوه کونج کې پټه شوم، څو چې پولیس له کارخونې ولاړل.»
مهریار څرګنده کړه: «ویزه مې ختمه شوې او د تمدید لپاره یې باید پيسې ورکړم چې وس یې نه لرم، دا مسله ما او زما کورنۍ ته لویه ستونزه ده او نه پوهېږم چې د ستونزې د حل لپاره چاته چیغې ووهم.»
له بلې خوا، د پاک – افغان خبریالانو نړۍوال انجمن د یادې پېښې له امله اندېښنه څرګنده کړې او له ملي او نړۍوالو ټولنو او د رسنیو له ملاتړو بنسټونو یې غوښتي چې په پاکستان کې د افغان خبریالانو لپاره د ژوند اسانتیاوې برابرې کړي.
د انجمن مشر د داسې پېښو دوام د خبریالانو او د دوی د کورنیو پر وړاندې د اندېښنې وړ بولي او د پاکستان له کورنیو چارو وزارت څخه غوښتنه کوي چې د افغان خبریالانو ستونزو په پام کې نیولو سره دوی ته د ویزې په برخه کې اسانتیاوې رامنځته کړي.
د یادونې ده، د افغانستان سرپرست حکومت تل ویلي چې په ټول هېواد کې امنیت تامین دی او هغه هېوادوال چې له هېواده بهر تللي، کولای شي بېرته افغانستان ته راشي؛ ځکه چې هیڅ ګواښ ورته نشته.
Views: 47
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن