[restrict paid=”true”]
اټلانټا (پژواک، ۱۷ غبرګولی ۱۴۰۲): امریکا او اروپایي ټولنې د افغانستان له سرپرست حکومته غوښتي چې په سرپل ولایت کې د نجونو زدهکوونکو مسمومېدو پېښه وڅېړي.
د روان لمریز کال د غبرګولي په ۱۴مه د سرپل امنیتي سرچینو ویلي وو چې د دغه ولایت سانچارک ولسوالۍ یوه ښوونځي کې ۶۰ زدهکوونکې مسمومې شوې دي.
د سرپل امنیې قوماندانۍ ویاند دینمحمد نظري پژواک ته وویل، یو شمېر ناپېژانده کسان د سانچارک ولسوالۍ په ابکلان کلي کې د نجونو یوه منځني ښوونځي ته ننوتلي، ټولګي یې سمپاشي کړي او د هماغې شپې په سبا ۶۰ زدهکوونکې مسمومې شوې دي.
د افغانستان لپاره د امریکا ځانګړي استازي ټام ویسټ د غبرګولي په ۱۷مه په یوه ټویټ کې د سرپل پر یادې پېښې ژوره اندېښنه څرګنده کړې ده.
Deeply concerned by reports that scores of schoolgirls may have been poisoned in Afghanistan’s Sar-e Pul province. Urge every measure be taken to investigate and keep children safe! Afghans deserve education without fear or restrictions.
— U.S. Special Representative Thomas West (@US4AfghanPeace) June 7, 2023
هغه د یادې پېښې په اړه د جدي پلټنو او د نجونو لپاره د زدهکړو خوندي چاپېریال برابرولو غوښتنه کړې ده.
بلخوا د افغان ښځو، نجونو او بشري حقونو لپاره د امریکا متحده ایالتونو ځانګړې استازې رینا امیري هم په سرپل کې د نجونو پر مسمومېدو اندېښنه وښوده.
مېرمن امیري پرون ناوخته په خپل ټویټر کې لیکلي چې د ماشومانو خوندیتوب د یقیني کېدو لپاره باید هر اقدام وشي.
Disturbed by reports that nearly 80 young girls were targeted & poisoned at their schools. Every measure must be taken to ensure the safety of all children. We must continue advocating for all Afghans, including women & girls, to access education without restrictions & fear.
— U.S. Special Envoy Rina Amiri (@SE_AfghanWGH) June 6, 2023
هغې لیکلي: «موږ باید د ښځو او نجونو په ګډون د ټولو افغانانو ملاتړ ته دوام ورکړو، له محدودیتونو او ډار پرته تعلیم ته لاسرسی ولري.»
که څه هم هغه ورځ ځایي مسوولینو د ۶۰ نجونو مسمومېدو خبره کړې وه خو اوس ځینو رسنیو د ۸۰ نجونو او ښوونکو مسمومېدو راپورونه ورکړي دي.
دغه راز د اروپایي ټولنې بهرنیو چارو او امنیتي پالیسۍ ویاندې نبیلا مسرالي هم د دغو نجونو مسمومېدو پر خبر ژوره خواشیني څرګنده کړې او په یوه ټویټ کې یې ویلي، واکمن چارواکي دې ته اړتیا لري چې د دغه بوږنوونکي جنایت پېښه تعقیب کړي.
له دې مخکې له ماشومانو د ملګرو ملتونو د ملاتړ صندوق (یونیسف) هم غوښتنه کړې وه چې اسلامي امارت باید د سرپل په سانچارک ولسوالۍ کې د زدهکوونکو نجونو مسمومېدو پېښه وڅېړي.
[/restrict]
Views: 100
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن