کابل (پژواک، ۲۵ چنګاښ ۱۴۰۲): د افغانستان لپاره د ملګرو ملتونو بشري مرستو د همغږۍ اداره وایي، افغانستان د نړۍ له هغو لسو هېوادونو دی چې تر ټولو ډېر اقلیمي بدلونونه او طبیعي افتونه تجربه کوي.
د ملګرو ملتونو دغې ادارې نن پر خپله ټویټرپاڼه د یادو څرګندونو ترڅنګ، د اقلیم بدلون په اړه د ملګرو ملتونو د سرمنشي انټونیو ګوټرېش خبرداري ته اشاره کړې چې ویلي یې وو، په نړۍ کې اقلیم بدلون له کنټروله وتلی دی.
اوچا زیاته کړې چې وچکالي د خلکو معیشت خرابوي او لوږه زیاتوي.
د افغانستان بهرنیو چارو وزارت تېر کال په لړم میاشت کې ویلي وو، افغانستان د اقلیم بدلون په برخه کې هیڅ ډول منفي سهم نه لري خو له اغېزو سره یې لاس او ګرېوان دی.
دغه وزارت ویلي وو چې افغانستان ته په ۱۴۰۱ کال کې د اقلیمي بدلونونو له امله څه باندې دوه میلیارده ډالر زیان رسېدلی دی.
د دغه وزارت ویاند عبدالقهار بلخي ویلي وو، د اقلیمي بدلونونو ناوړه احتمالي زیانونو په مخنیوي کې د ټولنې چمتووالي لپاره د نړۍوالې ټولنې پراختیايي مرستې حیاتي دي.
نوموړي دغهزار ویلي وو، څو چې افغانستان اقتصادي ثبات ته ونه رسېږي، دغه ډول ملاتړ اړین دی.
Views: 38
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن