کابل (پژواک، ۲ زمری ۱۴۰۲): د کابل امنیه قوماندانۍ وايي، هغه کس یې نیولی چې له ۱۱۰ کسانو یې په دې نوم پاسپورټونه او له هر یوه یې له زرو تر دوه زره ډالر اخیستي وو چې ګواکي هغوی ته تحصیلي ویزې راباسي.
د کابل امنيې قوماندانۍ وياند خالد ځدراڼ پژواک خبري اژانس ته وویل، يو شرکت په دې نوم چې تحصیلي ویزې راباسي، له ۱۱۰ کسانو پاسپورټونه او له هر یوه له زرو تر دوه زره ډالر اخستي وو.
ځدراڼ وایي، امنيتي ځواکونه د خلکو له عریضو او شکایت وروسته، لاس په کار شول او په دې تړاو یې يو تن نیولی او بل تښتېدلی، خو د نیولو هڅې يې روانې دي.
ځدراڼ وايي: «دا یو جعل کار وو، جعلکاري يې کوله؛ له دوی سره هېڅ کومې تحصيلي ويزې نشته.»
د شپږمې امنيتي حوزې مرستیال مولوي عبیدالله مظلومیار، د امنیه قوماندانۍ له خوا په خپره شوې وېډیو کې وايي، دوی ته ځيني کسانو شکايت وکړ چې يو سياحتي شرکت ته يې د تحصيلي ويزو ترلاسه کولو په موخه پاسپورتونه ورکړي، خو اوس هغه دفتر بند دی او مالک يې نشته.
هغه زياتوي: «موږ خپلو کشفي ارګانونو ته وظیفه ورکړه، بالاخره وتوانېدو چې دغه پاسپورټونه پيدا کړو.»
یو تن په یاده ویډیو کې وايي: «۲۵ ورځې وړاندې نور نړۍوال شرکت د ايټاليا تحصیلي ويزو د راېستو خبره وکړه، خو وروسته چې خبر شوو، سړی تښتېدلی او شرکت يې تړلی دی؛ حوزې ته عارض شوو او مننه کوو له مجاهدينو چې زموږ پاسپورټونه يې راپيدا کړل.»
مظلوميار وايي، د یاد شرکت مسوول د امنیتي ځواکونو له لوري تر پلټنې لاندې دی او ژر به د قانون منګولو ته وسپارل شي.
Views: 1337
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن