اټلانټا (پژواک، ۲۸ زمری ۱۴۰۲): د پښتونژغورنې غورځنګ مشر منظور پښتین ګواښ کړی چې که د پاکستان حکومت د پښتنو حقوق ور نه کړي او خپل روان ظلمونه ونه دروي نو اړ به شي چې د «ازادۍ» غږ پورته کړي.
نوموړي دا څرګندونې تېره شپه د پاکستان پلازمېنه اسلاماباد کې د خپلو پلویانو یوې لویې غونډې ته چې زرګونو کسانو برخه په کې اخیستې وه، کړې دي.
هغه په خپله وینا کې د پاکستان پر پوځ سختې نیوکې کړې چې ګواکې د پښتنو شتمنۍ یې انحصار کړې او د هغوی په سیمو کې یې قصدي ناامني جوړه کړې ده.
پښتین ویلي، له باجوړ څخه نیولې تر سوات، کوېټې او وزیرستان پورې زرګونه پښتانه مشران د پاکستان د پوځ له خوا وژل شوي او یا هم نادرکه کړی شوي دي.
هغه دغه راز زیاته کړې، د دوی سلګونه پلویانو اسلاماباد ته پر لاره نیول شوي او اجازه نه ده ورکړل شوې چې په دې غونډه کې ګډون وکړي، خو په لاهور کې د «ځناورو» لپاره د لاریون اجازه شته خو په اسلاماباد کې د پښتنو لپاره د غونډې او لاریون اجازه نشته.
منظور پښتین د غونډې پر ګډونوالو غږ کړی چې په خپلو کلیو کې د غورځنګ تنظیم لا فعال او منظم کړي.
نوموړي ګواښ کړی چې که غوښتنې یې ونه منل شي، نو بل ځل به اسلاماباد ته په بله بڼه راځي.
هغه د پاکستان پوځي جنرالانو ته د «بدمعاشانو» خطاب کړی او ویلي یې دي چې دوی خپله ډله جوړه کړې او پر پاکستان واکمني کوي.
د هغه په خبره، که چېرې د دوی ستونزې هوارې نه شي او غوښتنې یې ونه منل شي، نو بیا مجبور دي چې د «ازادۍ» غږ وکړي.
پښتين د پاکستان په پښتونخوا او بلوچستان ایالتونو کې د ترهګرۍ په روانه لړۍ، هدفي وژنو، جبري نادرکیو او هلته د پوځ پر زیاتېدونکي رول سختې نیوکې کړې دي.
نوموړي وېلي چې د پښتنو په سیمو سوات، بونير، دیر، پېښور، باجوړ، مومند، خیبر، وزیرستان، قلعه سیفالله او کوېټه کې خلک په زور نادرکه او پوه خلک په نښه کېږي.
هغه زیاته کړه، د پاکستان دولت ګوډاګی دی او پوځ د دولت تش په نوم ادارې له نړۍ د امتیازاتو اخیستلو لپاره جوړې کړې، نور واک نه لري.
هغه د پاکستان پوڅ ته ویلي: «بنګالیانو (بنګلهدېش) له تاسو پطلون وایست خو موږ به څرمن درڅخه وباسو.»
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن