کابل (پژواک، ۱۳ وږی ۱۴۰۲): د لوړو زدهکړو سرپرست وزیر شيخ نداءمحمد نديم وایي، په هیڅ وجه نه ځان او نه هم نورو ته د دې اجازه ورکوي چې په هېواد کې له تحصیلي نظامه سیاسي استفاده وکړي.
لوړو زدهکړو وزارت پر خپله اېکسپاڼه لیکلي چې تېره ورځ په ټولو دولتي او خصوصي تحصیلي بنسټونو کې د محصلینو د دیني معلوماتو لوړاوي په موخه د عباداتو، اخلاقیاتو او معاملاتو درسونه پیل شول.
د یاد وزارت سرپرست وزیر شيخ نداءمحمد نديم د یادو درسونو د پيل په مراسمو کې ویلي، د دغو درسونو موخه سیاسي نه، بلکې یوازې د محصلینو دیني اړتیاوې پوره کول دي.
هغه ویلي، په هیڅ وجه نه ځان او نه هم نورو ته د دې اجازه ورکوي چې په هېواد کې له تحصیلي نظامه سیاسي استفاده وکړي.
د یاد وزارت معلوماتو له مخې، په یادو درسونو کې عقیده، عبادات، معاملات، اخلاقیات، فکري پوهنه، ادیان، قران او معاصر علوم، د اسلام سیاسي، اقتصادي، اداري او ټولنیز نظامونه او د اسلامي تمدن مضمونونه شامل دي چې په مختلفو سمسټرونو کې به محصلینو ته تدریس کېږي.
یاد وزارت ویلي، د یادو درسونو لپاره یې ۹۰ تجربه لرونکي علما او استادان په افتخاري ډول ګومارلي چې محصلین د خپلو تخصصي زدهکړو ترڅنګ په سالمه فکري او عقیدوي مفکوره وروزل شي.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن