جلالاباد (پژواک، ۱۴ وږی ۱۴۰۲): د ننګرهار ولایت کوټ ولسوالۍ کې د کليو بيارغونې او پراختيا رياست له لوري د شپږ نيم ميليون افغانيو په لګښت د بيارغونې ۷ پروژې بشپړې شوې.
مسوولين وايي، په دغو پروژو کې د استنادي ديوالونو، سړکونو، کانالونو او د يو برېښنا کوټ جوړول شامل دي.
د ننګرهار د کليو بيارغونې او پراختيا رييس مولوي قسمتالله مبارز د وږي په ۱۴مه پژواک خبري اژانس ته وويل، د دغه ولايت کوټ ولسوالۍ کې د شپږ نيم ميليون افغانيو په لګښت اووه رغنيزې پروژې بشپړې شوې.
هغه زياته کړه: «د کوټ ولسوالۍ په کلاګۍ، ګنج کلي، اخندزادګان، سعادت مند، میراخېل او تنګي کلي کې د یونپس ادارې په شپږ نيم میليونه افغانۍ مالي لګښت او ډاکار مؤسسې په همکارۍ اووه پروژې بشپړې شوې.»
د مولوي مبارز په وينا، په دغو پروژو کې ۳۲۵ متره استنادي ديوالونو، ۲ کيلومټره فرعي سړک، ۵۰۰ متره کانال او د ۱۵ کيلوواټو په ظرفيت د يوه برېښنا کوټ جوړول شامل دي.
هغه وايي، په دغو پروژو کې پنځه زره ماهرو او غیرو ماهرو کارګرو ته د کار زمينه هم برابره شوې وه او سلګونه کورنۍ ترې اوس ګټه پورته کوي.
د دې سيمې اوسېدونکي هم د دغو پروژو پلي کېدو ته خوښ دي.
د سيمې يو اوسېدونکي ايازالله وايي: «د دې سیمې خلکو ته په ریښتیا هم تر دې دمه هیڅ خدمات نه و شوی دا چې اوس ورته د بیارغونې کارونه شروع شوي ولس خوښ دى.»
د کليو بيارغونې او پراختيا رياست مسوولين وايي، د دغه ولايت نورو ولسواليو کې هم د مختلفو ادارو په همکارۍ د بيارغونې ګڼې پروژې تر کار لاندې دي.
GET IN TOUCH
NEWSLETTER
SUGGEST A STORY
PAJHWOK MOBILE APP