<p style="text-align: justify;">غزنيښار (پژواک، ۶ تله ۱۴۰۲): د غزني د اجرستان مسوولین وایي چې د دې ولسوالۍ او د دایکنډي د میرامور ولسوالۍ د دوو قومونو ترمنځ لس کلنه دښمني په دوستي بدله شوه.</p>
<p style="text-align: justify;">د اجرستان ولسوال مولوي طیب پژواک خبري اژانس ته وويل، د ځايي مسوولینو او قومي مشرانو په هڅو او منځګړيتوب د دایکنډي د میرامور ولسوالۍ د هزارهګانو او د غزني د اجرستان ولسوالۍ د پښتنو ترمنځ لس کلنه دښمني په دوستي بدله شوه.</p>
<img class="wp-image-566448 aligncenter" src="https://pajhwok.com/wp-content/uploads/2023/09/دشمنی-در-غزنی-پایان-یافت-2.jpg" alt="" width="585" height="260" />
<p style="text-align: justify;">نوموړي وویل، لس کاله مخکې د غره او څرځایونو پر سر د یادو قومونو ترمنځ شخړه شوې وه چې له دواړو لورو په کې څلورو کسانو ته مرګژوبله اوښتې وه.</p>
<p style="text-align: justify;">د هغه په خبره، په دې دښمنۍ کې د اجرستان ولسوالۍ د لنګرخېلو کلي د ملاخېلو قوم یو کس محمدخان وژل شوی او بیا وروسته د دوی ترمنځ څو ځلې وسلهوالې نښتې شوې چې د دواړو خواوو درې کسان په کې ټپیان شوي وو.</p>
<p style="text-align: justify;">نوموړي وویل، د دې ولسوالۍ په نورو سيمو کې هم دې ته ورته لويې او وړې دښمنۍ شته چې د حل لپاره يې هلې ځلې روانې دي.</p>
<p style="text-align: justify;">د اجرستان یوه قومي مشر ځواک چې په دې روغه جوړه کې یې ګډون کړی، پژواک ته وویل، له کلونو راهیسې د پښتنو او هزارهګانو ترمنځ دلته بدي روانه وه چې یو قوم به هم په ډاډه زړه په خپلو سیمو کې ژوند نه شو کولای.</p>
<p style="text-align: justify;">هغه وایي چې د جرګې له پرېګړې سره سم د میرامور خلکو د اجرستان خلکو ته د یوه وژل شوي کس په بدل کې یو اعشاریه شپږ میلیونه افغانۍ ورکړې او دغه دښمني نور پای ته ورسېده.</p>
<p style="text-align: justify;">نوموړی وویل، له دې وروسته به دواړه خواوې د سولې او ورورګلوۍ تر سيوري لاندې ژوند کوي او په ښو چارو کې به يو بل ته لاس ورکوي.</p>
<img class="aligncenter wp-image-566450 " src="https://pajhwok.com/wp-content/uploads/2023/09/دشمنی-در-غزنی-پایان-یافت-1.jpg" alt="" width="585" height="255" />
<p style="text-align: justify;">دغه راز په غزني یوه مدني فعال مرتضی وردګ پژواک وویل، دا ډول روغې جوړې کولای شي د ولس ترمنځ یووالی رامنځته او د پرمختګ لپاره زمینه برابره کړي.</p>
<p style="text-align: justify;">نوموړي له سیمهییزو مسوولینو او قومي مشرانو مننه وکړه چې د دې شخړې د حل لپاره يې نه ستړې کېدونکې هلې ځلې کړې دي.</p>
<p style="text-align: justify;">هغه د هېواد د نورو سیمو پر حکومتي مسوولینو، علماوو او قومي مشرانو هم غږ وکړ چې په خپلو ولایتونو، ولسوالیو او کلیو کې د قومونو او کورنیو ترمنځ دغه شان شخړې هوارې کړي.</p>
<p style="text-align: justify;">د یادوني ده، له دې مخکې هم د غزني په قرهباغ، جاغوري، ناور، ګیلان او ناوې ولسوالیو کې د قومونو او کورنیو ترمنځ یو شمېر بدۍ د سیمهییزو مسوولینو، علماوو او قومي مشرانو په منځګړیتوب هوارې شوې دي.</p>
