مهترلام (پژواک، ۱۰ لړم ۱۴۰۲) : د لغمان کرنې ریاست مسوولین وایي، سږ کال په دغه ولایت کې د تېر کال په پرتله د سرو املوکو په حاصلاتو کې شل سلنه زیاتوالی راغلی دی.
د لغمان د کرنې ریاست د کرنیزو چارو امر انجینر بریالي همدرد پژواک خبري اژانس ته وویل چې سږ کال د مهترلام ترڅنګ د الینګار او الیشنګ ولسوالۍ اړوندو سیمو له ۴۰۰ هکتاره باغونو څخه ۱۲ زره ۸ سوه ټنه د سرو املوکو حاصلات ترلاسه شوي دي.
نوموړی وایي، تېر کال له یادو باغونو څخه ۱۰ زره ۲۴۰ ټنه حاصلات ترلاسه شوي و خو سږ کال بیا شل سلنه په کې زیاتوالی راغلی.
نوموړي د یادو حاصلاتو د زیاتوالي په اړه وویل: «مونز بڼوالو ته د تخنیکي برخې ترڅنګ د یوریا سرې، ژمني تیلو او د لایم سلفر درملو د استعمال په اړه لارښونې کړې وې، نو ځکه يې حاصلات هم ډېر شوي دي.»
بلخوا کروندګر هم د املوکو حاصلاتو ډېرېدو ته خوښ دي.
د مهترلام اړوند کتبزیو سیمې کروندګر محمد بصیر وویل، په یوه جریب ځمکه کې د املکو باغ لري او سږ کال يې حاصلات هم ښه دي.
هغه وايي: «د تېر کال په نسبت مې سږ کال حاصلات ډېر دي، خو بازار یې نه شته، له حکومته غواړو چې په بازار موندنه کې راسره مرسته وکړي.»
دغه راز، یو سوداګر عرفانالله وایي چې د املکو یو باغ يې په لغمان کې په بیه اخیستی، خو املوک سږ کال بازار نه لري.
هغه وايي چې حکومت باید املکو ته د بازار موندنې په برخه کې له کروندګرو او سوداګرو سره همکاري وکړي.
Views: 83
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن