کابل (پژواک، ۵ لېندۍ ۱۴۰۲): د کابل خاکجبار ولسوالۍ يو شمېر اوسېدونکي وايي چې د دې ولسوالۍ په مسلماباد سیمه کې د چرګانو دانې توليدوونکې یوې فابريکې له بدبويي په تنګ راغلي خو د فابريکې مسوولين بیا وايي چې خلک سلیقوي او عقدهيي چلند کوي.
د چرګانو دانې توليدوونکې دغه فابريکه – چې د کابل خاکجبار ولسوالۍ اړوند مسلماباد کلي ته څېرمه د لړمو کنج نومې سيمه کې فعاليت لري – له ښار او نورو سيمو د حلال شوو چرګانو وزرې، کلمې او نورې برخې دې فابريکې ته انتقالوي او هلته له پروسس وروسته ترې د چرګانو لپاره دانه جوړيږي.
د مسلماباد کلي يو شمېر اوسېدونکي وايي چې د يادې فابريکې فعاليت او بد بویي ورته ستونزې جوړې کړې دي.
د يادې سيمې یوه اوسېدونکي عبدالطيف پژواک ته وويل چې په دې سیمه کې د یوې فابریکې فعالیت او بد بويي خلک له ګڼو ستونزو سره مخ کړي دي.
دغه بوی دلته د خلکو تنفسي سسټم بندوي او نفس تنګي پيدا کوي.
دی وايي: «دا د چرګانو د دانې له فابریکې داسې بد بوی راځي چې د خلکو تنفس بندوي که دې ساحې ته څوک نابلده راشي، امکان دې ولري چې په هماغه شپه شفاخانې ته ورسېږي.»
دغه راز د دې سيمې يو بل اوسېدونکی حاجي ميرولي وايي چې د شپې له مخې دغه بد بوی څو برابره ډېریږي.
هغه وايي: «دغه بوی د شپې ځکه زيات وي چې دوی د ورځې تصفيه کوونکي وسايل نصبوي او د شپې له لوري يې ځکه لرې کوي چې مصرف پرې رانه شي.»
نوموړی زیاتوي، دوی له دې فابريکې سره هيڅ شخصي دښمني نه لري او نه يې له فابريکې د کار غوښتنه کړې.
د یادې سیمې یو شمېر نورو کسانو هم ورته څرګندونې وکړې او له حکومت نه يې د دې ستونزې د حل غوښتنه وکړه.
ورته وخت کې د يادې فابريکې يوه مسوول احمدالله پژواک ته وويل چې دغه فابريکه له استوګنې له سیمې شاوخوا درې کيلومتره فاصله لري او د کلي اوسېدونکي د شخصي عقدې له امله دغه شکايتونه کوي.
نوموړی وايي، دغه یوه تولیدي فابريکه ده، نږدې ۱۴ ميليونه افغانۍ بودجه پرې مصرف شوې او ۴۵ کسانو ته په کې د کار زمينه برابره شوې ده.
دی زیاتوي: «موږ د موادو د پروسس او د هوا ککړتيا مخنيوي لپاره تصفيه کوونکي وسايل نصب کړي چې نه بوی خارجيږي او نه هم هوا ته کوم زيان رسېږي.»
د نوموړي په وينا، د چاپېريال ساتنې ادارې يو پلاوی تېر کال ورغلی و، د دوی کار يې ليدلی او ورته ويلي يې دي چې کار يې معياري دی او ستونزه نه لري.
ورته مهال، د خاکجار ولسوال ملا غلام صديق دانش وايي چې د يادې ستونزې په اړه ورته د سيمې خلک عارض شوي دي.
نوموړی وايي چې څه موده وړاندې دوی دغه عريضه د کابل د چاپېريال ساتنې ادارې ريیس ته سپارلې او هغوی سيمه کتلې خو دا چې سيمه له فابريکې لرې ده او دغه بوی سيمې ته نه رسېږي نو فابريکې ته د فعاليت اجازه ورکړل شوې ده.
خو زیاتوي، دوی به بيا هم د کابل د چاپېريال ساتنې له ادارې سره په ګډه يو ځل بیا له دې سیمې او فابريکې لیدنه وکړي، که چېرې ستونزه موجوده وه نو رسېدنه به ورته وکړي.
Views: 191
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن