پلخمري (پژواک، ۲۰ مرغومی ۱۴۰۲): د سالنګ لویې لارې د باروړونکو موټرو یو شمېر چلوونکي وايي چې د «سالنګ ټولپلازا» محصول راټولولو چارو بېنظمي رامنځته کړې او حکومت دې په دې برخه کې اسانتیاوې رامنځته کړي.
د سالنګ تونل له بیارغولو وروسته د سالنګ دواړو غاړو کې له کوچني مسافروړونکو موټرو ۸۰ افغانۍ او له لویو باروړونکو موټرو د ټایرونو د شمېر په اندازه د هر یو ټایر پر سر۱۰۰ افغانۍ «د سالنګونو لپاره د ټولپلازا» په نوم محصول اخیستل کېږي.
د یادې لارې لسګونو موټرچلوونکو نن د بغلان په کېلګي سیمه کې د یوې غونډې پر مهال د سالنګ ټولپلازې محصول ټولولو کې د اسانتیاوو رامنځته کولو او پر دې لاره د بار کرایې لوړولو غوښتنه وکړه.
د دې لویې لار یوه موټر چلوونکي شېرخان پژواک خبري اژانس ته وویل چې د ټولپلازې محصول ورکولو پر مهال د ګڼېګوڼې له امله چارې پر وخت او سمه توګه نه ترسره کېږي او دغه کار د بېنظمۍ لامل شوی دی.
هغه وایي: «د سالنګ ټولپلازې محصول کې دومره ګڼهګوڼه او ګډوډي وي چې ځیني وخت له موټرچلوونکو محصول زیات خو پارچه له اصلي محصول څخه کمه ورکړل شي. حکومت دې د سالنګ ټولپلازې محصول کې د روڼتیا رامنځته کولو په موخه چارې ګړندۍ یا هم د ټولپلازو محصول خونې ډېرې کړي »
یوه بل موټرچلوونکي سیدولي وویل چې سالنګ تونل په بیارغېدو سره د دوی ستونزې یو څه هوارې شوې، خو ټوله لار نه ده جوړه شوې.
هغه زیاتوي چې حکومت دې دسالنګ ټولې لارې تر جوړېدو یا ددغې لارې کرایه د نور جوړو لارو په پرتله زیاته کړي او یا دې د ټولپلازې محصول دسوداګرو پرغاړه کړي.
د شمال باروړونکو موټرو د اتحادې ریس سرباز کوچی وایي، دغه ټولې ستونزې چې چلوونکي ورسره مخ دي د ترانسپورټ وزارت له مسولینو سره به یې شریکې کړي او له شمالي ولایتونو مرکز ته د بار کرایې د زیاتولو غوښتنه به هم وکړي.
خو د سالنګ لویې لارې د څار او ساتنې ادارې مسوول عبدالحلیم اغا وایي، سالنګ کې د ټولپلازې محصول چارې څاري او هیچا ته د ګډوډۍ او درغلۍ اجازه نه ورکوي.
هغه وایي، د موټرچلوونکي هغو غوښتنو ته چې د دوی اړوند دي، رسېدنه کېږي.
د هغه په خبره، هڅه کوي چې د ټولپلازې محصول چارې ګړنډۍ شي څو ګڼهګوڼه نه وي او موظف مامورین وکولای شي ټولو چلوونکو ته پر وخت رسېدنه وکړي.
GET IN TOUCH
NEWSLETTER
SUGGEST A STORY
PAJHWOK MOBILE APP