کابل (پژواک، ۲۲ مرغومی ۱۴۰۲): افغانستان لپاره د بریتانیا شارژدافیر د ریاستالوزاء له سیاسي مرستیال سره په لیدنه کې ویلي، هېواد یې افغانستان کې د دایمي سولې او ثبات پلوی دی او له نړۍ سره د کابل د تعامل لپاره هڅه کوي.
ارګ پر اېکسپاڼه د یوه پیغام په خپرولو سره، په سپېدار ماڼۍ کې د افغانستان د ریاستالوزاء سیاسي مرستیال مولوي عبدالکبیر او د افغانستان لپاره د بریتانیا شارژدافیر رابرت چارترن ډکسن لیدنې په اړه خبر ورکړی دی.
د ریاستالوزراء سیاسي مرستیال ویلي، د افغانستان او بریتانیا دوستانه اړیکې دي او اسلامي امارت له نړۍ په ځانګړې توګه له لندن سره د مثبت تعامل غوښتونکی دی.
هغه زیاته کړې: «بریتانیا دې د افغانستان ریښتینی انځور نړۍ ته وړاندې کړی او له اسلامي امارت سره دې تعامل وکړي.»
بلخوا، په یاده لیدنه کې د بریتانیا شارژادفیر ویلي، هېواد یې افغانستان کې د دایمي سولې او ثبات غوښتونکی دی، له همدې امله له نړۍ سره د کابل د تعامل او اړيکو برخه کې هڅه کوي.
د هغه په خبره، له نړۍ سره د افغانستان تعامل دوامداره سیاسي اړیکو او خبرواترو ته اړتیا لري.
ډکسن زیاته کړې چې بریتانیا غواړي افغانستان له نړۍ سره ونښلوي او د هغوی ترمنځ ناسم پوهاوی له منځه یوسي.
دا په داسې حال کې ده چې پرون د بهرنیو چارو وزارت سیاسي معین، شېرمحمد عباس ستانکزي هم له چارترن ډکسن سره لیدنه کړې وه.
په یاده لیدنه کې د بهرنیو چارو وزارت سیاسي معین ویلي وو چې اسلامي امارت له ټولو لورو سره تعامل او خبرې اترې د هېواد، سیمې او نړۍ په ګټه بولي.
Views: 56
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن