کابل (پژواک، ۲۷ مرغومی ۱۴۰۲): د عامې روغتیا سرپرست وزیر د پولیو ناروغۍ اروزنې او همغږۍ کلنۍ غونډه کې ویلي چې د هېواد ګوټ ګوټ کې به ماشومانو ته د پولیو واکسین ترڅنګ معیاري روغتیايي خدمتونه ورسوي.
د عامې روغتیا وزارت په خبرپاڼه کې راغلي چې نن په دغه وزارت کې د پولیو ناروغۍ ارزونې او همغږۍ کلنۍ غونډه ترسره شوه.
سرچېنې لیکلي، په دې غونډه کې د یاد وزارت سرپرست ډاکټر قلندر عباد پولیو ناروغي د افغانستان لپاره یو ستر ګواښ یاد کړ او زیاته یې کړه چې دغه وزارت د یادې ناروغۍ د کنټرول او مخنیوي اړوند د روغتیا نړۍوال سازمان، بېلګیټس بنسټ او ورته نورو بنسټونو له استازو سره غونډې او بحثونه ترسره کړي دي.
د هغه په خبره، د اسلامې امارت په راتګ سره د لومړي ځل لپاره په ۲۰۲۲ او ۲۰۲۳ زیږدیز کلونو کې په ټول هېواد کې د پولیو ناروغۍ يواځې اته مثبتې پېښې لرلې چې دا د پولیو د پېښو په کنټرول او مخنیوي کې یوه ستره لاسته راوړنه ده.
عباد ویلي: «موږ ژمن یو چې د هېواد ګوډ ګوډ ته د معیاري روغتیايي خدمتونو د رسولو ترڅنګ د هېواد ټولو ماشومانو ته د پولیو واکسین رسولو کې مرسته وکړو؛ تر څو په هېواد کې په بشپړ ډول د پولیو ویروسي ناروغۍ له مینځه یوسو او د دې ناوړه ناروغۍ څخه پاک افغانستان ولرو.»
د عامې روغتیا سرپرست ۲۰۲۴ زیږدیز کال د پولیو ناروغۍ د له مینځه تلو او کنټرول لپاره وروستی کال یاد کړ او ویلي یې دي چې دغه وزارت د خپلو شریکانو سره یو ځای په پلان کې لري، چې د روان زیږدیز کال په ترڅ کې په ټول هیواد کې د پولیو واکسین د تطبیق څلور کمپاینونه ترسره کړي.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن