[restrict paid=”true”]
خوست ښار (پژواک، ۱۳ سلواغه ۱۴۰۲): د کورنيو چارو سرپرست وزير سراج الدين حقاني وايي افغانستان دې د نړۍ نورو پرمختللو هېوادونو سره نه پرتله کېږي، اوسني حکومت ته دې لږ ورخت ورکړل شي.
نوموړي دا څرګندونې د جمعې به ورځ د «سلواغې ۱۳مه» خوست کې د «نورالقران» په نوم د يوې دينې مدرسې فراغت غونډې ته وکړې.
سرپرست وزير سراج الدين حقاني وويل د وطن او دين څخه له دفاع پرته چې ټول په کې شريک دي، په نورو مواردو کې هره اداره او کس مسوول او مکلف دی چې يواځې د خپلې ادارې کارونه او مسووليتونه تعقيب کړي.
هغه پرته له دې چې د کوم چا او يا ډلې نوم واخلي په خپله ساده لهجه وويل، که هر څوک اتلولي کوي، نو په سخته ورځ دې يې وکړي، نه په ساړه ميدان.
ده واکمنانو ته په خطاب کې وویل:”په ځان کې تواضع پيدا کړئ ځکه چې زموږ نظام ډېر سپېڅلی دی، داسي کړنې بايد ترسره کړو چې ولس مو بد دعا جوړ نشي”.
حقاني وویل : «په شل کلن جهاد کې موږ په دفاعي حالت کې وو، موږ د داسې بدمعاشانو په مقابل کې ودرېدو چې د هيچا فتوا ته مو اړتیا نه لرله ، چې هر څومره زور مو استعمالولو د ځان د شهرت په خاطر نه، بلکې د وطن د ازادۍ په خاطر مو دا کارونه کول، نن الحمدالله خپلواک افغانستان خدای په لاس راکړی.»
سراج الدين حقاني دغه راز وويل چې د اوسني شته امنيت د خونديتوب لپاره تر ټولو مهم څه چې بايد ترسره شي، هغه د اعتماد بشپړه فضا رامنځته کول دي.
د هغه په وينا، که د اعتماد فضا رامنځته نه شي او دوی پر يوه او بل بې باوره وي، نو لرې نه ده شته چې شته امنیت به په لوی لاس خراب کړي.
ده زياته کړه: « ملت يو نظام قبول کړ او يو نظام يې راوست د جهاد په نتيجه کې، د نظام د پياوړتيا لپاره چې مشرتابه موجود وي کابينه موجوده وي او ادارې موجودې وي بايد موږ دومره ځانونه مشران او خانان جوړ نه کړو چې د خپلو مشرانو حيثيت پيمالوو او خپل نوم او اشتهار ته اوليت ورکړو. خبرې خو مو ډېرې ښې زده دي، ولې اصل عمل مهم دی.»
د کورنيو چارو سرپرست وزير دغه راز له خلکو وغوښتل چې دوی ته دې لږ وخت ورکړي او هغه څه دې ترې نه غواړي چې په اوسنيو حالاتو کې د دوی په وس او توان کې نه وي.
د هغه په وینا، افغانستان دې د نړۍ نورو پرمختللو هېوادونو سره نه پرتله کېږي.
ورته مهال د يادې ديني مدرسې غونډې ته د کډوالو او راستنيدونکو چارو سرپرست وزير خليل حقاني په هېواد او بهر کې د ځينو مغرضو کړيو هغه خبرې بې بنياده وبللې، چې اوسنۍ نظام عادل او مسلکي نه دی.
هغه که څه هم په ښکاره د کوم چا نوم وانخيست خو زياته يې کړه، کوم کسان چې دا ډول څرګندونې کوي، خپله په ګڼو بې عدالتيو او نورو ناروا کړنو کې لاس لري.
ده زياته کړه: «دا خلک په خپله غير مسلکي دي چې د افغانستان د علماوو نظام ته په سپک نظر ګوري. دا نظام په ډېرو قربانيو لاسته راغلی.»
د کورنيو چارو او د کډوالو راستنيدونکو سرپرست وزيران خوست کې داسې مهال يادې څرګندونې کوي، چې څو ورځې وړاندې د رياست الوزرا سياسي مرستيال مولوي عبدالکبير هم په دغه ولايت کې يوې غونډې ته ويلي و، چې چې په اوسنۍ سرپرست حکومت کې د افغانستان د ټولو قومونو او مذهبونو خلک موجود دي او د نړۍوالو هغه څرګندونې بې اساسه دي، چې ګني دا حکومت ټول شموله نه دی.
[/restrict]
Views: 29
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن