اسلام اباد کې د ا.ا.سفیر له متقي سره د وروستیو تحولاتو په اړه خپل راپور شریک کړ

[restrict paid="true"]

کابل (پژواک، ۴ وری ۱۴۰۲):  په اسلام اباد کې د اسلامي امارت سفیر د بهرنیو چارو وزیر مولوي امیر خان متقي ته له پاکستانیو چارواکو سره د خپلو وروستیو لیدنو کتنو راپور شریک کړ.

د بهرنیو چارو وزارت لخوا د وري په ۴مه، په یوه خپپره شوې خبرپاڼه کې راغلي، د بهرنیو چارو وزارت سرپرست مولوي امیرخان متقي نن په خپل دفتر کې د افغانستان او پاکستان په اړیکو کې د وروستیو تحولاتو په اړه په پاکستان کې د افغانستان سفارت د سرپرست مولوي سردار احمد شکېب راپور واورېد.

سرچینې زیاته کړې، سردار شکېب ‏په دغه کتنه کې د پاکستان له چارواکو سره د خپلو وروستیو ناستو او لیدنو راپور د بهرنیو چارو وزارت له سرپرست سره شریک کړ او د افغانستان او پاکستان د وروستیو پرمختګونو او اړیکو په اړه یې هراړخیزې خبرې وکړې.

په ورته وخت کې د بهرنیو چارو وزارت سرپرست د راپور له اورېدو وروسته په اسلام آباد کې د افغانستان سفارت سرپرست ته د دواړو هېوادونو ترمنځ د رامنځته شوي وضعیت او اړیکو په اړه لازمې لارښوونې وکړې.

د یادونې وړ ده چې پاکستانیو الوتکو څو  ورځې مخکې په پکتیکا ولایت کې پر افغان خاورې هوایي بریدونه کړي وو، چې له امله یې یو شمېر ملکي کسانو ته مرګ ژوبله اوښتې وه.

تر دې بریدونو وروسته د دواړو هېوادونو اړیکې ترینګلې او د چارواکو لخوا تُند غبرګونونه وښودل شول، خو په اسلام اباد کې د اسلامي امارت سفیر سردار شکېب پرون افغانستان لپاره د پاکستان ځانګړي استازي اصف دراني سره ولیدل او د اړیکو پر ښه والي یې خبرې وکړې.

[/restrict]