پاراخ (پژواک، ۱۷ غویی ۱۴۰۳): سیمهییز مسوولین وايي، د پروان په بګرام ولسوالۍ کې کوچیانو او د پنجشېر د پریان ولسوالۍ د ځايي خلکو ترمنځ ۱۵ کلنه شخړه چې له دواړو لورو پهکې دوه کسان وژل شوي وو، د مسوولینو او قومي مشرانو په منځګړیتوب پای ته ورسېده.
پنجشېر کې د شخړو د هواري کمېټې رییس محمدرها ابرار پژواک خبري اژانس ته وویل: «دغه دښمني پنځلس کاله مخکې د خاواک کوتل پر سر د کوچیانو قوم د عبدالجان او د پریان ولسوالۍ اوسېدونکي عبدالرووف کورنیو ترمنځ له لفظي شخړې وروسته رامنځته شوه چې په پایله کې یې د عبدالرووف ورور یو کوچی وواژه.»
سرچینې زیاته کړه چې د دوی ترمنځ د دښمنۍ د څوارلس کلونو له تېرېدو وروسته، تېر کال د عبدالجان کوچي ورور او زوی د عبدالرووف لمسی په ډزو وواژه چې دغه قضیه تر اوسه نه وه حل شوې.
په دې اړه د پنجشېر د رسنیو دفتر د یوې خبرپاڼې په خپرولو سره لیکلي چې د دغه ولایت والي محمداغا حکیم د یادو دواړو کورنیو ترمنځ د شخړې هواري پر مهال ویلي چې اسلام سپېڅلی دین د ورورۍ، خپلوۍ، مهربانۍ او یو بل منلو دین دی او مسلمان باید د الهي احکامو په رڼا کې خپلې دښمنۍ او اختلافات له منځه یوسي او یووالي ته لومړیتوب ورکړي.
د پنجشېر والي ټینګار کړی چې د اسلامي نظام مشران دې هره موضوع د اسلامي شریعت له مخکې حل کړي.
د دې خبرپاڼې له مخې، د پنجشېر د علماوو شورا رییس مولوي قیامالدین حنیف هم په خپلو خبرو کې وویل چې د دوی ادارې د ا.ا له لومړیو تر اوسه سلګونه وړې او لویې قضیې هوارې کړې دي.
هغه کورنۍ چې دښمنۍ ته یې د مسوولینو او قومي مشرانو په منځګړیتوب د پای ټکی کېښودل شو، د خوښۍ په څرګندولو سره وايي چې د مسوولینو او خلکو په شتون کې یې د لوړې په کولو سره تېره قضیه هېره کړه او له دې وروسته به سولهییز ژوند کوي.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن