<p style="text-align: justify;">کابل (پژواک، ۱۷ غبرګولی ۱۴۰۳): قزاقستان د ترکمنستان له لارې د یوې بدیلې لارې پر جوړولو کار کوي څو له افغانستان سره یې سوداګري له یو میلیارد ډالرو څخه درې میلیارد ډالرو ته لوړه کړي.</p>
<p style="text-align: justify;">د انټرفکس خبري اژانس د <strong><a href="https://www.interfax.kz/?lang=eng&int_id=21&news_id=67806#:~:text=June%205%20%28Interfax-Kazakhstan%29%20-%20Kazakhstan%20is%20developing%20an,%243%20billion%2C%20Deputy%20Prime%20Minister%20Serik%20Zhumangarin%20said.">راپور</a> </strong>له مخې، د قزاقستان د لومړي وزیر مرستیال سیرک ژومانګارین دغه څرګندونې تېره ورځ کړې دي.</p>
<p style="text-align: justify;">هغه د جزییاتو له ورکولو پرته ویلي چې دغه لار به له ترکمنستان څخه تېریږي.</p>
<p style="text-align: justify;">ده هیله څرګنده کړې چې دا بدیله لار به له افغانستان سره د قزاقستان سوداګري په کال کې له یو میلیارد ډالرو څخه ۳ میلیارد ډالرو ته لوړه کړي.</p>
<p style="text-align: justify;">دا په داسې حال کې ده چې د غویي په ۱۳مه د قزاقستان ولسمشر قاسم جومارت توقایف له افغانستان سره د اړیکو لا پراختیا په هدف د «افغان طالبانو نوم د ترهګرو سازمانونو» له نوملړه لرې کړ او افغان حکومت هم دغه ګام وستایه.</p>
