کابل (پژواک، ۲۹ وږی ۱۴۰۵): د افغانستان بانک وایي، خلک کولای شي د افغانۍ زاړه بانکنوټونه په مرکز او ولایتونو کې د دغه بانک څانګو او سوداګریزو بانکونو ته وسپاري او په بدل کې یې سالم بانکنوټونه ترلاسه کړي.
د افغانستان بانک د نن ورځې په اعلامیه کې د هغو بانکنوټونو بېلګې او ځانګړنې هم په ګوته شوي چې زاړه بلل کېږي.
د اعلامیې له مخې، هغه بانکنوټونه چې د ډېرې کارونې له امله یې ظاهري بڼه بدله شوې وي، یوه برخه یې پرې شوې وي، ډېر څه پرې لیکل شوي وي او یا یې امنیتي نښې تر ډېره له منځه تللې وي، خو اصليوالی یې د پېژندلو وړ وي، زاړه او د بدلېدو وړ بانکنوټونه بلل کېږي.
دغه راز، د دغه بانک له لوري د خپاره شوي انځوریز لارښود له مخې هغه بانکنوټونه چې د ډېرې کارونې له امله زاړه او نرم شوي وي او د پیسو د شمېرلو په ماشینونو کې د شمېرلو وړ نه وي، او همدارنګه هغه بانکنوټونه چې څو ځایه څېرې شوي او بېلابېلې برخې یې په چسپي پټه رغول شوې وي، زاړه بانکنوټونه بلل کېږي.
د افغانستان بانک ټینګار کړی چې د دغه ډول بانکنوټونو لرونکي کولای شي خپل بانکنوټونه په مرکز او ولایتونو کې د دغه بانک څانګو او ټولو سوداګریزو بانکونو ته وسپاري او په بدل کې یې سالم بانکنوټونه ترلاسه کړي.
دغه بانک له خلکو غوښتي، که د فرسوده بانکنوټونو د بدلولو په بهیر کې له ستونزې سره مخ کېږي، خپل شکایت دې د دغه بانک د مالي مشتریانو د حقونو له اړوندې څانګې سره شریک کړي.
په اعلامیه کې راغلي چې په دې برخه کې به د خلکو شکایتونو ته ژر رسېدنه وشي.
