<p style="text-align: justify;">کابل (پژواک، ۲۴ غبرګولی ۱۴۰۳): د کډوالو او راستنېدونکو چارو وزارت له خوا د ورکړل شوو معلوماتو له مخې، په تېرو اوو ورځو کې له پاکستان او ایرانه ۲۷ زره او ۸۳۱ افغان کډوال هېواد ته راستانه شوي دي.</p>
<p style="text-align: justify;">دغه کډوال د غبرګولي میاشتې له ۱۷مې تر ۲۳مې پورې له پاکستان او ایرانه په زور او یا خپله خوښه راستانه شوي دي.</p>
<p style="text-align: justify;">پژواک خبري اژانس دغه شمېرې له تېرو اوو ورځو راهیسې د کډوالو او بېرته راستنېدونکو چارو وزارت پر اېکسپاڼه د خپرو شوو معلوماتو له مخې را اخیستې دي.</p>
<p style="text-align: justify;">د دغه وزارت د معلوماتو پر بنسټ، د یادو کډوالو له ډلې ۶۵۳۴ کسان چې شاوخوا ۱۲۰۶ کورنۍ کېږي د تورخم او سپنبولدک له لارو له پاکستانه په جبري ډول راایستل شوي دي.</p>
<p style="text-align: justify;">دغه راز، په یاده موده کې ۲۱۲۹۷ کسان د هرات اسلامکلا بندر او د نیمروز د ابرېشم پله له لارو له ایرانه په خپله خوښه او جبري ډول هېواد ته راستانه شوي دي.</p>
<p style="text-align: justify;">د یادونې ده، د روانې غبرګولي میاشتې له لسمې تر ۱۶مې پورې له پاکستان او ایرانه ۱۴۱۹۱ افغان کډوال په زور او یا خپله خوښه هېواد ته راستانه شوي وو.</p>
