نیلي (پژواک، ۲۳ چنګاښ ۱۴۰۳): د دایکنډي د عامې روغتیا ریاست مسوولین وايي، د دغه ولایت په سنګتختوبندر ولسوالۍ کې د ۲۶۰ زره امریکايي ډالرو په لګښت یوه روغتيایی مرکز ته ودانۍ جوړه او ګټې اخیستنې ته وسپارل شوه.
د دایکنډي د عامې روغتیا ریاست د نشراتو مدیر نوید ذکي وویل چې د دغه «BHC» روغتیایي مرکز ودانۍ تېره ورځ د ځايي مسوولینو، تطبیق کوونکو موسسو او ځايي اوسېدونکو په شتون کې ګټې اخیستنې ته وسپارل شوه.
هغه زیاته کړه چې د یاد روغتیایي مرکز ودانۍ د «UNHCR» په مالي مرسته د وطن پراختیايي او ټولنیزې موسسې له لوري جوړه شوې ده.
هغه زیاته کړه چې د یاد روغتیايي مرکز پر جوړېدو ۲۶۰ زره امریکايي ډالره لګښت راغلی دی.
نوموړي څرګنده کړه چې د دایکنډي د عامې روغتیا رییس ډاکټر غني صمیم د دغه مرکز د پرانیستې پر مهال وویل، امنیت او روغتیا د یوې ټولنې سترې اړتیاوي دي چې د ده په اند، اوس خلک له دغو دواړو برخمن دي.
د دایکنډي د عامې روغتیا رییس د دغه روغتیايي مرکز له پرسونل څخه وغوښتل چې لا ښه روغتیايي خدمتونه وړاندې کړي او ټینګار یې وکړ چې له مراجعینو سره دې نیک چلند وشي.
Views: 9
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن