کابل (پژواک، ۱۰ وږی ۱۴۰۳): د ازموینو ملي ادارې مسوولین وایي، یاده اداره په پام کې لري چې د راتلونکي کال کانکور ازموینه په درېیو برخو (طبي، ساینسي او ټولنیز علوم) کې اختصاصي کړي او د ازموینو قانون مسوده هم بشپړه شوې ده.
د ازموینو ملي ادارې سرپرست شیخ عبدالباقي حقاني نن په کابل کې د حکومت د اطلاعاتو او رسنیو مرکز کې د حکومتي ادارو د یو کلنو لاستهراوړنو د تشريح پروګرام کې وویل، د ازموینو قانون مسوده بشپړه شوې او د وروستیو اجرااتو لپاره عدلیې وزارت ته لېږل شوې ده.
دی وایي، د ازموینو ملي ادارې د بېلابېلو برخو لپاره لس طرزالعملونه او دوه لایحې جوړې شوې دي.
هغه زیاته کړه، د لومړي ځل لپاره د افغانستان په اوو زونونو کندهار، هرات، بلخ، بامیان، کندوز، پکتیا او ننکرهار کې د ازموینو ملي ادارې واحدونه فعال شوي دي.
دی زیاتوي، د پوهنې له وزارت سره د شاوخوا ۴۰ زره ښوونکو د ګومارنې په موخه هوکړهلیک لاسلیک شوی دی.
د ده په خبره، په تېر یوه کال کې د ازموینو ملي ادارې له لوري د بېلابېلو ادارو لپاره ۵۸ لویې او وړې ډلهییزې ازموینې اخیستل شوې دي.
د هغه د معلوماتو له مخې، په تېر یوه کال کې په ټولیزه توګه له ۱۷۷ زره او ۲۰ کسانو ازموینه اخیستل شوې چې له ډلې یې ۸۷۱۰۳ کسان بېلابېلو ادارو ته د بریالیو کسانو په توګه ورپېژندل شوي دي.
حقاني دغه راز وویل، سږ کال د کانکور ازموینه په څلورو ژبو پښتو، دري، انګلیسي او عربي واخیستل شوه او دغه راز د ازموینې د پوښتنو وخت له ۱۶۰ دقیقو څلورو ساعتونو ته وغځېد.
دی وایي، د سږني کانکور ازموینه د افغانستان په کچه ۱۵۰ زره کسانو ګډون کړی و او په پنځو دورو کې تنظیم شوې وه.
د ازموینو ملي ادارې د پوښتنو بانک د تنظیم چارو رییس استاد عرفانالله عباد په دې غونډه کې وویل، دغه اداره په پام کې لري چې د راتلونکي ۱۴۰۴ کال کانکور ازموینه په درېیو برخو طبي، ساینسي او ټولنیزو علومو کې اختصاصي کړي.
دی وایي، د پوهنې او لوړو زدهکړو له وزارتونو سره خبرې روانې دي او له يادو وزارتونو سره تر هوکړې وروسته به د ۱۲ ټولګيو له فارغانو د طبي، ساينسي او ټولنيزو علومو برخو کې اختصاصي ازموينه اخيستل کېږي.
هغه زیاته کړه، د درېیو واړو برخو ګډونوال به له ازموينې مخکې مشخص او هر څوک به په اړوند برخه کې ازموينه ورکوي.
دی زیاتوي، د ازموینو ملي ادارې په تېر یوه کال کې په مرکز او ولایتونو کې د ډلهییزو ازموینو د حقالشمول له درکه ۱۰۰ میلیون، ۱۶۵ زره او ۸۰ افغانۍ عواید ترلاسه کړي دي.
هغه همدارنګه وویل، د ازموینو ملي ادارې چې تر اوسه کومې ډلهییزې ازموینې اخیستې، یوازې څلورځوابه پوښتنې یې راوړې دي او د تشریحي پوښتنو لپاره یو طرزالعمل جوړ شوی چې د تایید په موخه د مشرتابه مقام ته استول شوی دی.
د ازموینو ملي ادارې د مسوولینو معلوماتو له مخې، د راتلونکي کال کانکور لپاره تدابیرو نیول، د ازموینو قانون مسودې نهايي کول، ادارو ته د کسانو ګومارلو لپاره د ډلهییزو ازموینو اخیستل او د سیستمونو پراختیا د راتلونکي کال لپاره د دې ادارې د پلانونو په توګه یاد کړل.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن