د روغتیا نړۍوال سازمان له افغانستان سره د ۱،۴ میلیون ډالرو په ارزښت د درملو او روغتیايي کېټونو مرسته وکړه

کابل (پژواک، ۱۷ تله ۱۴۰۳): افغانستان کې د روغتیا نړۍوال سازمان استازولۍ اعلان کړی چې د هېواد د ۲۲ ولایتونو له ۱۶۶ روغتیايي مرکزونو سره یې د ۱.۴ میلیون امریکایي ډالرو په ارزښت د درملو او روغتیایي کېټونو مرسته کړې ده.

یاد سازمان نن (سه‌شنبه، د تلې ۱۷مه) پر خپله اېکس‌پاڼه لیکلي: «موږ له خپلو شریکانو سره په ګډه روغتیایي خدمتونو ته د لاسرسي ښه کولو او په محرومو سیمو کې د ژوند ژغورلو ته ژمن یو.»

سرچینې دغه راز لیکلي: «د روغتیا نړۍوال سازمان د ژمني پلان یوې برخې په توګه د افغانستان په ۲۲ ولایتونو کې ۱۶۶ روغتیايي مرکزونو ته د څه باندې څلور میلیونه امریکايي ډالرو په ارزښت ۱۱۴ ټنه روغتیايي کېټونه او اړین درمل ورکړل شول.»

نړۍوال روغتیایي سازمان وايي، یادو مرستو کې هغه درمل او وسایل شامل دي چې د ژمي په موسم کې به له موسمي ناروغیو سره د مبارزې په موخه اړمنو کسانو ته ووېشل شي.

د سرچینې د معلوماتو له مخې، له دې مرستو به په یادو ولایتونو کې څه باندې ۸۰۰ زره کسان برخمن شي.