م‌.م: غواړو تر راتلونکي کاله افغانستان کې ۴۲ سلنه پرمختیايي پروژې پلي کړو

کابل (پژواک، ۲۸ لړم ۱۴۰۳): د افغانستان د کرنې وزارت د مالدارۍ او کرنې مرستیال په افغانستان کې د ملګرو ملتونو د خوړو او کرنې سازمان له رییس سره لیدنه کې ویلي، د دې وخت رارسېدلی چې دغه سازمان په افغانستان کې د بېړنیو پروژو سربېره، لویې پرمختیايي پروژې هم پلې کړي.

د افغانستان د کرنې، اوبولګولو او مالدارۍ وزارت نن (دوشنبه، د لړم ۲۸) پر خپله اېکس‌پاڼه لیکلي چې د دغه وزارت د کرنې او مالدارۍ مرستیال مولوي صدراعظم عثماني په افغانستان کې د ملګرو ملتونو د خوړو او کرنې سازمان (اېف‌اې‌او)  له مشر رچارډ ترینچارډ سره لیدنه کې د پرمختیایي پروژو پر اهمیت ټینګار وکړ.

سرچينې د دغه وزارت د مرستيال په حواله ليکلي: «اوس د دې وخت رارسېدلى چې د ملګرو ملتونو د خوړو او کرنې سازمان د بېړنيو پروژو ترڅنګ، لويې پرمختيايي پروژې هم پلې کړي، ځکه چې بېړنۍ پروژې لنډمهاله دي.»

هغه دغه‌راز ټینګار وکړ چې د کرنې پر مهال باید کروندګرو ته اصلاح شوي تخمونه ووېشل وشي او د هغو کسانو لپاره چې ځمکې او د کښت شرایط لري، دغه مرستې باید په پام کې ونیول شي.

سرچينې ليکي، د ملګرو ملتونو د خوړو او کرنې سازمان رییس ريچارډ ترنچارډ د دغه سازمان اصلي موخه له افغان کروندګرو او خلکو سره مرسته وبلله او زياته يې کړه چې هوډ لري راتلونکی کال په افغانستان کې ٤٢ سلنه پرمختيايي پروژې پلې کړي.