حنفي: د سره صلیب او سرې میاشتې ټولنې دې له افغانانو سره خپلو مرستو ته دوام ورکړي

کابل (پژواک، ۳۰ مرغومی ۱۴۰۳): د ریاست‌الوزراء اداري مرستیال د سره صلیب او سرې میاشتې ټولنې د نړۍوال فدراسیون د آسیا پاسیفیک حوزې له رییس سره په لیدنه کې غوښتي چې له افغان ولس او اجباري راستانه شوو کډوالو سره خپلو مرستو ته دوام ورکړي.

له ارګه په خپره شوې خبرپاڼه کې راغلي چې د ریاست‌الوزراء اداري مرستیال مولوي عبدالسلام حنفي تېره ورځ د سره صلیب او سرې میاشتې ټولنې د نړۍوال فدراسیون د آسیا پاسیفیک حوزې له رییس الکساندر ماتیو او مل پلاوي سره لیدلي.

سرچینې لیکلي، حنفي په دغه لیدنه کې ویلي چې افغانان د اقلیمي تغییراتو، طبیعي پېښو لکه زلزلې او سېلابونو له امله سخت زیانمن شوي، دغه راز زرګونه افغانان د ځینو ګاونډیو هېوادونو له لوري په اجباري توګه را ایستل شوي دي.

نوموړي د سره صلیب او سرې میاشتې ټولنې د نړۍوال فدراسیون له مسوولینو وغوښتل چې افغان ولس او اجباري راستانه شوو کډوالو سره خپلو مرستو ته دوام ورکړي.

خبرپاڼه کاږي چې الکساندر ماتیو وویل، دوی تر اوسه د افغانستان په بېلابېلو ولایتونو کې د طبیعي پېښو زیانمنو، بې‌وزله کورنیو ته د کارموندنې او اړمنو کسانو ته د واکسین ترڅنګ د افغاني سرې میاشتې له لارې د سوري زړه لرونکو ماشومانو د عملیات برخه کې له افغانانو سره مرستې کړې دي.

هغه همدا راز زیاته کړه چې دوی په پام کې لري له دې وروسته هم د اسلامي امارت په مرسته او همکارۍ په یادو برخو کې خپلې مرستې دوامداره وساتي.