د کاناډا بهرنیو چارو وزیر د اسلامي امارت له بنده د ډیویډ لاوري له خوشي کېدو خبر ورکړی

کابل (پژواک، ۸ سلواغه ۱۴۰۳): د کاناډا د بهرنیو چارو وزیر وايي چې د دغه هېواد پخوانی سرتېری ډیویډ لاوري په افغانستان کې له زندانه له خوشي کېدو وروسته قطر ته رسېدلی او له هغه سره یې خبرې کړې دي.

د کاناډا بهرنیو چارو وزیر ملاني جولي پر خپله اېکس‌پاڼه د یوه پیغام په خپرولو ویلي چې د ډیویډ لاوري روغتیايي وضعیت ښه دی.

نوموړي لیکلي: «ما همدا اوس له ډیویډ لاوري سره چې له افغانستانه قطر ته رسېدلی، خبرې وکړې، روحیه یې ښه ده.»

هغه له قطره مننه کړې چې منځګړیتوب یې وکړ او دا پروسه یې اسانه کړه.

د ویلو ده، د روان کال په لړم میاشت کې سي‌ټي‌وي راپور ورکړی و چې د ډیویډ لاوري په نوم د کاناډا یو اوسېدونکی په کابل کې د اسلامي امارت له لوري نیول شوی دی.

ورته مهال، اسلامي امارت تر اوسه د یاد کاناډايي وګړي د خوشي کېدو په اړه څه نه دي ویلي.