<p style="text-align: justify;">کابل (پژواک، ۲۳ غویی ۱۴۰۴): د افغانستان لپاره د بېپولې ډاکټرانو د سازمان مشر د عامې روغتیا وزارت له سرپرست سره لیدنه کې د همکاریو پر دوام ټینګار کړی او ویلي یې دي چې دغه سازمان افغانستان کې د روغتیايي خدماتو ښه کولو او پراخولو ته ژمن دی.</p>
<p style="text-align: justify;">د افغانستان د عامې روغتیا وزارت نن (سهشنبه) د یوې <strong><a href="https://x.com/MoPH_afg/status/1922157243216097563">خبرپاڼې</a> </strong>په خپرولو د افغانستان لپاره د بېپولې ډاکټرانو سازمان له مشر میکایل لیپي سره د دغه وزارت د سرپرست مولوي نورجلال جلالي د کتنې خبر ورکړی دی.</p>
<p style="text-align: justify;">جلالي هېواد کې له روغتیايي سکټور سره د دغه سازمان د مرستو زیاتوالی اړین بللی او په دې برخه کې یې د خدماتو د لا ډېرېدو غوښتنې ترڅنګ، د روغتیايي کارکوونکو پر ظرفیت لوړونې، د خدمتونو د کیفیت پر ښه کولو او اغېزمنتیا هم ټينګار کړی دی.</p>
<p style="text-align: justify;">دغه راز، میکایل لیپي هم افغانستان کې روغتیايي خدماتو پر ښه کولو او پراخولو ټينګار کړی او ژمنه یې کړې چې د روغتیايي خدمتونو د کیفیت ښه کولو او همغږي لپاره به لا زیاتې هڅې کوي.</p>
<p style="text-align: justify;">بلخوا، هغه په هرات، کندوز او هلمند ولایتونو کې د روغتیايي خدماتو د دوام په اړه خبرې کړې او زیاته کړې یې ده چې په دغو ولایتونو کې د دوی لخوا روغتیايي مرکزونه به د عامې روغتیا له وزارت سره په همکارۍ او همغږۍ خپلو فعالیتونو ته دوام ورکړي.</p>
