کابل (پژواک، ۲۰ غبرګولی ۱۴۰۴): د راپورونو له مخې، د اتریش په سوېل کې یوه ښوونځي کې د ډزو له امله د یوه سړي په ګډول ۹ زدهکوونکي وژل شوي او ۱۰ نور کسان ټپیان شوي دي.
رویترز خبري اژانس راپور ورکړی چې دغه پېښه نن د اتریش په ګراتس ښار کې شوې ده.
راپور کې راغلي چې د یادې پېښې قربانیانو کې اته زدهکوونکي او یو سړی شامل دي او لږ تر لږه ۱۰ نور کسان ټپیان شوي دي.
د ګراتس د ځايي پولیسو ویاند رسنیو ته ویلي چې وضعیت تر کنټرول لاندې او عادي حالت ته راګرځېدلی دی.
رویټرز د «کرونن تسایتونګ» ځایي ورځپاڼې له قوله لیکلي چې د تورن کس جسد د ښوونځي په تشناب کې موندل شوی دی.
په راپور کې راغلي چې اتریش یو له هغو اروپایي هېوادونو دی چې د ملکي وګړو ترمنځ د وسلو د مالکیت لوړه کچه لري.
د «کوچنیو وسلو سروې» د څیړنیزې پروژې د شمېرو پربنسټ، په دغه هېواد کې په منځني ډول له هرو ۱۰۰ کسانو څخه شاوخوا ۳۰ یې وسله لري.
سرچینې زیاته کړې چې د یادې پېښې د انګېزې او څرنګوالي په اړه څېړنې روانې دي.
