کابل (پژواک، ۲۵ تله ۱۴۰۵): د راپورونو له مخې، په بلوچستان ایالت کې ناپېژاندو کسانو ۲۰ پاکستاني پولیس تښتولي؛ مسوولینو ويلي چې د راخوشي کولو لپاره یې هڅې روانې دي.
د اېکسپرېس اردو ورځپاڼې د راپور له مخې، دغه پېښه نن د بلوچستان په کلات ولسوالۍ کې شوې ده.
سرچینې زیاته کړې ده چې تښتول شوي پولیس د بلوچستان د رخشان سیمې اوسېدونکي دي او په کلات کې یې د پولیسو په مرکز کې روزنه لیده.
پولیسو ویلي، یاد کسان په یوه شخصي مسافروړونکي موټر کې په رخصتۍ خپلو کورونو ته روان وو چې د کلات ولسوالۍ په مربوطاتو کې تښتول شوي دي.
هغوی زیاته کړې چې تښتول شوي پولیس لومړی مستونګ ولسوالۍ او بیا نامعلوم ځای ته انتقال شوي دي.
د بلوچستان امنیتي مسوولینو ویلي چې د تښتول شوو پولیسو د ساتلو ځای معلومولو او د هغوی د راخوشي کولو هڅې روانې دي.
تر اوسه د دې پېښې د عاملینو هویت نه دی څرګند او کومې ډلې یې مسوولیت هم نه دی منلی.
