کابل (پژواک، ۲۵ تله ۱۴۰۵): د امریکا د کالیفورنیا ایالت په سوېلي برخه کې د سختو بادونو له امله خپاره شوي ځنګلي اور لږ تر لږه شپږ کورونه سوځولي او زرګونه کسان یې د خپلو کورونو پرېښودو ته اړ کړي دي.
د اسوشېټېډ پرېس خبري اژانس د راپور له مخې، دغه اور چې «نورټې» نومېږي، د جمعې په ورځ د اورنج کاونټي په سانکلیمینټې ښار کې پیل شوی او د سختو «سانتا انا» بادونو له امله سانخوان کاپیسترانو ښار ته غځېدلی دی.
د اورنج کاونټي د اوروژنې ادارې مشر ټيجي مکګاورن ویلي، د جمعې تر شپې پورې شاوخوا ۱۶ زره کسانو ته د خپلو کورونو د پرېښودو امر شوی و.
د راپور له مخې، یو شمېر اوسېدونکو د اور له خپرېدو سره سم خپل کورونه پرېیښي او په سانکلیمینټې او سانخوان کاپیسترانو ښارونو کې د بېځایه شویو لپاره لنډمهالي مرکزونه پرانیستل شوي دي.
چارواکو ویلي، د اوروژنې دوه کارکوونکي د سختې ګرمۍ له امله زیانمن شوي او روغتون ته لېږدول شوي دي.
د سانکلیمینټې ښاروال ریک لوفلر ویلي، که بادونه لږ نور هم سخت وای یا یې لوری بدل شوی وای، ښايي د اور زیانونه ډېر زیات شوي وای.
د اسوشېټېډ پرېس د معلوماتو له مخې، په سیمه کې د «هېنډرسن» په نوم بل اور هم د کمپ پنډلټن پوځي اډې ته څېرمه خپور شوی او د امریکا د پنځمې لویې لارې یوه برخه یې د څو ساعتونو لپاره تړلې وه.
د دغو اورونو له امله د کالیفورنیا په ځینو سیمو کې د اور د لا خپرېدو د مخنیوي لپاره برېښنا هم پرې شوې ده.
د امریکا د هوا پېژندنې ملي ادارې خبرداری ورکړی چې سخت بادونه، ګرمه هوا او وچ اقلیمي شرایط د اور د خپرېدو خطر زیاتوي.
د چارواکو په وینا، د «نورټې» اور د لګېدو لامل لا نه دی معلوم شوی او څېړنې روانې دي.
