<p style="text-align: justify;">جلالاباد (پژواک، ۲۵ زمری ۱۴۰۴): د ننګرهار امنیه قومانداني وایي چې په دغه ولایت کې یې د جعل او تذویر په تور دوه کسان نیولي دي.</p>
<p style="text-align: justify;">د ننګرهار د امنیې قوماندانۍ خبرپاڼه کې راغلي چې د دې قوماندانۍ اړوند له ترهګرۍ سره د مبارزې مدیریت منسوبینو دوه کسان د جعل او تذویر په تور ونیول.</p>
<p style="text-align: justify;">خبرپاڼه کې راغلي: «له نیول شوو کسانو ۳۵ دانې جعلي مهرونه (ټاپې) او یو شمېر جعلي اسناد ترلاسه شوي دي. لومړنیو څېړنو ښودلې چې یادو کسانو د اسنادو او مهرونو په جعل کې مستقیم لاس درلود.»</p>
<p style="text-align: justify;">سرچینه دغه راز کاږي چې نیول شوو کسانو پر خپلو جرمونو اعتراف کړی دی.</p>
<p style="text-align: justify;">امنیې قوماندانۍ لیکلي چې یاد کسان به له لومړنیو څېړنو وروسته عدلي او قضایي ارګانونو ته وسپارل شي.</p>
