کابل (پژواک، ۱۶ زمری ۱۴۰۵): په اسپانیا کې د سیوټا د سیمهییز حکومت مشر وایي، د دغه ښار پر پوله د کډوالو د پراخ هجوم پر مهال شاوخوا ۱۰۰ کسان مړه شوي او زرګونه کډوال لا هم هلته پاتې دي.
رویټرز خبري اژانس د پنجشنبې په ورځ، د زمري په ۱۵مه، د سیوټا د سیمهییز حکومت د مشر خوان خسوس ویواس له قوله راپور ورکړی چې نوموړي د اروپا پارلمان په ناسته کې ویلي، د تېرې اوونۍ د کډوالو د پراخ هجوم پر مهال شاوخوا ۱۰۰ کسان مړه شوي دي.
ویواس زیاته کړې چې لا هم له درېیو تر پنځو زرو پورې کډوال په سیوټا کې پاتې دي.
ګارډین ورځپاڼې هم راپور ورکړی چې ویواس د مړو شمېر شاوخوا ۱۰۰ تنه او په سیوټا کې د پاتې کډوالو شمېر له درېیو تر پنځو زرو پورې ښودلی دی.
سیوټا د شمالي افریقا په خاوره کې، له مراکش سره پر پوله د اسپانیا تر حاکمیت لاندې یو خودمختار ښار دی. دغه ښار د اروپایي ټولنې د قلمرو برخه ده او له مراکش سره یې پوله د شېنګن سیمې له بهرنیو پولو څخه شمېرل کېږي.
اسوشیټیډپرېس د ویواس د تازه شمېرو له اعلان مخکې، د اسپانیا او مراکش د چارواکو له قوله راپور ورکړی و چې په دې پېښه کې تر ۸۰ ډېر کډوال مړه شوي؛ یو شمېر یې ډوب شوي او ځینې نور د یوه څپېماتوونکي خنډ د اوښتو پر مهال په ګڼهګوڼه کې تر پښو لاندې شوي وو.
اسوشیټیډپرېس زیاته کړې چې دې پېښې په اروپایي ټولنه کې د کډوالۍ بحث یو ځل بیا تود کړی او د اسپانیا د لومړي وزیر پدرو سانچز د کډوالۍ پالیسۍ د دې ټولنې د یو شمېر مشرانو له سختو نیوکو سره مخ شوې دي.
